sakar_kamil.jpg

ڕێگەها ئاسێبوونێ

ساکار کامل- دهۆک

خوین ژ دەهمەنێن ئاخێ د هەڕکت و

ئەز ژ هەژا ئێتوونەکێ د پەشم

بەر ب مەشەکا یاخی

ژ ژانێن من

هەوارەک ژ دایک دبیت 

کێلیێن گۆرستانێ کت کتە د هەژمێرم

ب هەر یەکێڕە یا خوە!

برینەک ژ جانێ من د ئارت

کەنگێ دێ ژ ڤێ وەهمێ دەرکەڤین؟

 

مستەک ڕۆناهی ژ چاڤێن یەقینێ

گلوازەک درێژ ژ هەقیقەتێ دچنم 

د بەر بەژنا تە ڕادئێخم

توو دبییە وەهمەک ژ ڤەدەرییێ.

د ڕێگەها ئاسێبوونێدا

هەموو ئاسیمان ئاسێ مان!

 

دلۆپەک پڕ ژ غەزەبێ

ژ سحرا دیتنێ دکەڤیت

ئاخ کەڤران دادقوریت

باران عەوران دخۆت

جام بادەیێ سەرخوەشدکت

توو ژ کیژان دەرزا ئەردی دکەڤی؟

شەڤێ چەند تاڕی ڤەخوار؟

چەند پلێن ئاخێ د خەودا فەتسین؟!

ئەز بەرماییا وێ تۆزێ مە،

یا دبن لنگێن هەسپێ زەمەنیدا

هێدی هێدی ب هەیەجان

دکەڤتە سەر پەلگێن نەفەلەکا هشک!

 

پەلێن دارێن دەمساڵەکا عشقێ

حیکایەتا وەریانێ بۆ سەڕابێ ڤەدگێرن

سەڕابەک تژی کلامەکا نەسترایی!

 

د ڤێ مەملەکەتێدا

گاڤا عشق ڤەدەربوو!

ئێدی..

ماسی د گۆلاندە ئاڤژەنیێ ناکن

نەورەس لسەر پەڕاڤێن دەریایی نافڕن

 

گاڤا عشق ڤەدەربوو!

کۆلانێن ڤی باژێری خالی دبن ژ ڕەفێن تاووسان

بولبۆل ناخوینن و

بێهنا بهارێ ژ پڕچا شەنگەبییا نائێت.

 

گاڤا عشق ڤەدەربوو!

بایەک سەفەرێ ناکەت بۆ کنارێ دیجلە

بێهنا عتران ژ کۆلانێن پاریس غەریب دبیت

 

گاڤا عشق ڤەدەر بوو!

توو دبیە ژنەک ژ بەفرێ

سپی وەک داڤێن پڕچا پیرەژنەکێ

ساڵێن تەمەنێ وێ ڕەش

توو دبیە ژنەک ژ بەفرێ

همبێزا تەیا ساڕ نەبت

چ جار من گەرم ناکەت!

دەمێ ژنەک مۆزیکێ دژەنت

پڕچا وێ مینا ڕەشەبایێ سلێمانیێ سەمایێ دکەت

ژ تایەکی ئازادی

ژ تایەکی دی ئاوازەک

ژ تایێ دن کەڤاڵەک

و ژ هەمووان

عشق دشارییێت..

 

من ژبیرکریە ب بارینا هەر بارانەکێ

لەهییەک ژ شعرا من ژی دگریت

ئەو شعرا توو تێدە،

سەفەرێ دکەت

سەفەرەکە دوور دوور

بۆ مالا وێرانیێ!

بۆ باغێ ژ گولان چۆل،

بۆ دارستانەکە ترسناک

 

سەفەرەک دوور دوور

بۆ کنارێن بێدەنگیێ

سەفەرەک،

ب ئەندازەیا ڕەفێن هەموو کنارییان

 

کەشتییەک بن ئاڤ دبیت

کانییەک ژبن لنگێن خەریبیێ دزێت

ژ هەر جۆکەکا وێ لەهیەک ب من دکەڤیت

کانییەک، کۆ ماسییێن وێ دخوازن بفڕن

کانییەک، ئاڤا وێ ب جۆش غەریب ژ هشکاتیێ

کانییەک، غەریب ژ قەشایێ

 

سبە شاعرەک دێ ژ دایک بیت!

هەموو چیرۆکێن نەفەلان بۆ گولدانێن خوە گۆتین

دێ نڤیسیت

سبەی شاعرەک دێ ژ دایک بیت!

هەموو لەهەنگێن خوین ژ بەدەنا وان هاتی

دێ نڤیسیت

سبەی شاعرەک ل کۆلانێن باژێری دێ گەڕیێت

بێهنا گولان دێ خرڤەکەت

دێ ئێتە بەر پەنجەرەیا تە

هەموویێ ل پڕچا تە وەرینت

 

سبەی شاعرەک دێ ژ دایک بیت!

ژ خەیالا دایکەکا کەلۆگری

هەموو هێسترێن وێ دێ خرڤەکەت،

دێ فڕوشتە دەریایی

ب باقەک گولیێن گەنمی!

 

ما تو چەند جاران بەدەنا من دێ بن ئاخ کەی؟

چەند دەمساڵێن دی ژ ساڵنامەیێ بوەریێن

بەفرا چەند بەفرانبارا ببت لەهی

شەڤێن چەند چریان درێژتربن

تا گولیەکا گەنمی سەرێ خوە ژ جەهنەما ئەردی بلندبکەت

وێستگەهێن دەمی، ئارامی لێ بسەکنت

 

ئەز ل دەمساڵا فڕینێ

توو ژی ل وەرزێ کۆچبەریێ

پەیا دبین

توو دفڕی بۆ جەمسەرێ مژێ

ئەز ژی ژ ڕەفا خوە ڤەقەتیایی!

 

ل پشت وێ پەنجەرێ

گولیێن گەنمی دەستێن خوە بۆ عەوران بلند دکن

د بەندەمانا هەر بارینەکێدا!

ب دەهان گورزێن وان د ئاخێ ڕا دچنە خوار!

 

ل پشت وێ پەنجەرێ

زارۆکەک ژ تێهنا د مریت

ڤۆڵکانەک د چاڤێن دیا ویدە د ڕژت!

هەموو بێهنا گولان د سۆژیت

ل پشت وێ پەنجەرێ

شعرەک ئاڤا دبیت

پەیڤێن وێ

دکەڤنە گۆڤەندەکا تەڕاژیدی!

 

ل پشت وێ پەنجەرێ

ئەز،

گولیێن گەنمی،

ئەو زارۆک،

و شعر

ب ئارامی ل سەر لەشێ ئەڕدی د نڤین.


ئەم بابەتە 83 جار خوێندراوەتەوە