Farshid.jpg

بۆ سوورترین دەسکەوتی خوا

فەرشید ڕۆستەمی- سنە

ئەوەندە لە خۆما وەیلان ئەتکێم، هەرچی جارە تەنیاییم بە فۆرمێکی شێواوتر بەرۆکم ئەگرێ و حەیران، قەرزاری چارەنووس و ئەم دێڕانەم ئەکا

بگرە ئیتر لە درێژەی بیست و وردەیەک ساڵیمدا، لەم دیوارە خاڵیە ئەوەندە پووچ بڕوانم، هیچ گۆرانیەک تەفسیری دواترین ڕۆژم نەکاتەوە. ئەسڵەن ئەوەندە بمرم و وێران، گۆڕکەنەکان لێم زیز بن وقەبرەکان ئیتر لە هیچ ئەنازەیەکی خۆیاندا جێم نەکەنەوە!

ئاوایە کە زمانی حاڵم پشتی ئەشکێ و سینە و بەرۆکی زاماری هەندێ وشەی ناتەواو ئەبێ، کتێبەکانیش لە سووچێکی کەلەکا، نەکراوە و پژاو دوور ئەگرن، ئەدەبیات ڕسوا ئەبێ و

نووسەرەکان    ڕووت و قووت

بە لای خواری خواری خۆیانەوە سەرقاڵن!

ئاوایە هێشتاکە درێژەم بەم شکڵە ئەبینی:

لە خەمێکی چوار دیواری و قەوارەیەک کراسی ئەرخەوانی ئەدوێم، بێ خەیاڵ وەک تابلۆ داکوتراوەکان، بێ ئەوەی نیگەرانی ویرووس و نەفرەتەکانی سەردەم بم، پڕ بە چارۆکەکەی دایەم نۆستالۆژی مەحاڵم پێیەو، دەنگی هەواڵەکان مەوادیەکە کاکەشانی و قیامەت..

هەر مەگەر ڕۆژی قیامەت بێتەوە فکرم (۱)

لە درێژەی ئەم دێڕەدا دڵتەنگیم ئەبێتە سێ بەش و بێ بەش لە خۆرئاواترین شوێنی ئەم دنیا، ئەوەی وا لەبەر چاوە، زستانێکی پا پەتی و بەفرانبارێک بۆ خەڵوەتی شەوانەمە

یەکەم:

سەرەتایێ پڕمە و پانتۆڵێکی چڵکن، هەندێ هاوڕێی بێ هیوا، کە بیر لە پاڵەوانە ئەفسانەییەکان ئەکەینەوەو، بێزوو بە سەر و سمتی ژنە سۆزانیەکانیش،

پێمان وایە سەرەوەی شار تا ئێستە، نە پارکەکانی گریانی کرێکارێکیان بە خۆوە بینیوە، نە بێوەژنەکانی ترسی باوەشێکیان بۆ پاروویەک نان کڕیوە!

باوکیشم هەمووکات دوای نوێژەکانی چاو بە فرمێسک و دەس بە دۆعا، بۆ بەختەوەری من لە درگانەی خوا ئەپاڕێتەوە، نەکا کتووپڕ بۆ دەرکی جوانیەک، شوێن پاو پووزەی کچە هاوسێکان کەوم..

ئەو ساڵانە نیشتمان ناوێکی قاچاخ بوو تەنیا، شەودرەنگان لە ڕادیۆیەکی کۆنەدا ئەمانبیست و هەستمان بە غەریبی و مەغریبێکی دوور ئەکرد!

یەکەمجار من کە پێم خزا، زانیم جاری واش هەیە زەوی لەتر ئەدا و گەردوون کە تووشی بەدمەستی ببێ، مرۆڤ ئەکات بە دیکتاتۆر و شیعر دەرمانێک یەک کەسی..

ئەبوا یەخەی کام کراسی دایکم بگرم؟   ئێوە بڵێن

خۆم لە باوەشی هەمیشەیی بشارمەوەو سوکنایی دەسی بە بەیتێکی فۆلکڵۆر، خەوێکی ئەبەدی بە چاوما بێنێ..

جاران لە خەونەکانمدا، پڕ بوو لە گوڵەبەڕۆژە و دەستەکانی تۆ

تۆ کە دواتر ئیمانی من بە ئاسمان و سەرتریش ئەشێوێنی، ماکسیەکی شل بە شانتا خزەو

سینەت ئێوارانی سنە و بگرە خۆشتر

جگەرەیەک دات ئەگیرسێنم      قەینا خانم؟

جارانم ئەونە پەنجەرە بوو، بە شانمەوە مەرگ و سەفەرێکی ناوەخت... هێندە کتووپڕ لە خۆما

تەواوی جادەکان ئەڕۆیشتم لە تۆتۆی ئاوێنەکاندا

جاران.. جەنابت خانم! مانتۆکەت بڕێک درێژتر و مەعسووم

بە ئاماژەی سەرپەنجەکانت  نزیکتر

[ - بێ تۆ گۆرانیەکان ئەگەن بە هیچ و ئەولاتر

خاڵیم لە تەختایی سینەت بە گیانت دەی

سەبرم ئاخرترین سەفەرەن ئەگەر ئەڵێی

مەولەوی پیاوی خوا بوو وا مایەوە.. ]

لە دووهەم دا کە ئێستەیە، وشەکان پاشگرێکی بێتاقەت ئەلکێنم، سامانی با بردووم کۆڵانێکی بۆن بەستە و پتر نامۆ

ناوشانم بە دیوارە خاڵیەکانەوە ئێستاکەیش

ناونیشانیم:

ناوەڕاستی ئەم وشانە  هەرکوێ تەنگتر

دواهەمین گەڕەکی دنیا و ئاخرین ماڵ، وەک پاڵم بە جەنازەیەکەوە دابێت، خەریکم شیعرێک بۆ سوورترین دەسکەوتی خوا ئەنووسم!

نزیکە شەڕڤانێک بم تاق و تەنیا، کە دوایین سەنگەری ڕووخابێت، هاوڕێکانی خەڵتانی خوێن بووبن و مابێتەوە یەک فیشەک..

نزیکە نەزرەکانی منداڵیت بێتە دی، کەیف خۆشی، دەس نەماوە لە کافەکان بازیی نەکەیت و خەوڵەتی سینەمایەک نەماوە

لێوەکانتی پێ نەبەخشی

نزیکە تەپڵی تەنیاییم بژەنم بە عالەمدا، ڕوو کەم لەو کچانەی دوای تۆ ئەیانناسم و بڵێم:

وەها بوو ئەو

: ددانەکانی لە هیچ گۆرانیەکدا تەلاوەت نەکردبوو، نەیتوانیبوو ڕابردووی لە کتێبێکی کوردیدا چاڵ بکات، شانەکانی هەردەم عادەتیان زەماوەن و لە لەرزینی لەشی پێکراوی ئاسکێک بە شاخێکی بەفراوی‌دا، هەر ئاخێک حاڵی بوو! باوەشی هەمیشە بۆ بووکە شووشەو کوڕەهاوسێکانیان کراوە بوو..

لێ گەڕێ!

ئەم حاڵە کۆچێکە بێ وەخت بەرەو داهاتوو کوتی کۆتاییم

بەرەو بەیانیەک وا، دیسک و چەوری خوێن فشاری بۆم هێناوە، دونیایشم دوور بێ لە ڕووتان، توالێتێکی گشتیەو لە گۆرانیەکی جوانیمدا عەلی مەردان، چەن ڕۆژ تر مۆڵەتم ئەدا، بەشکوو ئیزرائیل، ئەو لامە بە وشەکانەوە ماوە نەیبا و ئەم لایشمە وا چەپە و پێکراوە، بە سروودێکی حەماسی لێم بسێنێت..

یەکجار سەختە، ڕۆژانێکی ڕەش بەسەرمدا هاتبێ و پشتم بە بیرەوەری ساڵانی ڕابردوو چەمابێتەوە! بەیانیەکی زوو بە هەڵکەوت، لە نەخۆشخانەیەکی قەرەباڵغدا بتبینمەوە، تۆ بۆ زایمانی کچەگەورەگەت هاتبی و منیش، لە بیرم بچێتەوە بۆ!

شەرت بێ داتبنیشێنم، پەرەستار و دوکتورەکان بانگ بکەم و حەکایەت... هەموو ئەو شەوانەی بە قژمەوە سپی بوون و شیعر، دەنگ هەڵبڕم بە ساڵۆندا:

کچێ!

پێکەنیت هەموو ئێسقانەکانم ئێشام، نامەکانت پێنج فەرزە بە تاقی بێ‌کەسیمدا گریام، هێشتا ئەو قەنەفانەی بڕیار بوو شەکەتیت دەر بکەن قەرزارم! ئێستە کە لێوەکانت بۆنی قەبر و بەهەشت ئەدەن، لە سەر ئەو برانکاردەی دوکتورەکان بۆیان نووسیوم، بۆ دوایین جار ماچم بکە

با دەم و چاوم کەمتر لۆچ ببێ و وەک شاعیرێکی نیشتمان پەروەر، بۆت بتکێم سەر لە نوێ و وەیلان.

ئەوا خۆم جێ ئەهێڵم لە پیریما و دایئەنێم بۆ ئێوارەکانت، کە لاشەت بۆنی بەفر و نوستالۆژی ئەدا

باوەشیشم قەتارێکی سەرەڕێیە بۆ هاتنەوەت

ئەو دەمەی کەس نیە بۆت بمرێ و جگەرەیەک بۆت دائەگیرسێم 

ئاگری نەورۆز!

۱: مەحوی


ئەم بابەتە 51 جار خوێندراوەتەوە