Dastan.jpg

له‌ پاسێكدام ده‌فڕێت و له‌ ده‌ره‌وه‌ مانگ ده‌بارێت

داستان به‌رزان- سلێمانی

به‌هه‌موو توانایه‌كته‌وه‌ ڕابكه‌

له‌و كه‌سانه‌ى كه‌ مێژووت بۆ هه‌ڵده‌به‌ستن

چونكه‌ ئه‌وان ده‌یانه‌وێت پێت بڵێن:

تۆ به‌سه‌ر چوویت، تۆ مردوویت!

 

ئه‌وان بۆ ئه‌وه‌ى پێت بڵێن:

تۆ گه‌یشتوویته‌ته‌ خاڵى كۆتایی

به‌ڵام به‌ هه‌رچى بیرته‌ بزانه‌

كه‌ مرۆڤى ڕاسته‌قینه‌ خاڵى كۆتایی ناناسێت!

 

ئه‌وانه‌ى كار له‌ دروستكردنى مێژوودا ده‌كه‌ن

ئه‌و كه‌سانه‌ن له‌ لابوره‌كانى ڕابردوودا

به‌دیار كه‌مۆڵه‌ى پڕ له‌ بیره‌وه‌رییه‌وه‌

ده‌یانه‌وێت بۆمانى بسه‌لمێنن كه‌ دونیا ته‌واو بووه‌

به‌ڵام تۆ دڵنیابه‌ و خۆشبه‌خت

چونكه‌ دونیا هه‌رچه‌نده‌ كۆنه‌، به‌ڵام كۆتایی نه‌هاتووه‌.

 

مێژوو ده‌ستت ده‌بڕێت

فریوت ده‌دات

فێرت ده‌كات كه‌ڕووى ڕابردوو بخۆیت

به‌ گیاى په‌شێمانیى كاوێژ بكه‌یت

نه‌توانیت ده‌نكه‌ جۆیه‌ك بچێنیت

جیهانت له‌به‌رچاو ده‌كات به‌ تۆز.

 

مێژوو مه‌شقی تێدا نییه‌

جووڵه‌ى تێدا نییه‌

بێبه‌ر و بێفه‌ڕ

زه‌وییه‌كه‌ خه‌ونى تێدا سه‌وز نابێت

وه‌همێكه‌ ته‌نیا ته‌مبه‌ڵه‌كان خۆشحاڵ ده‌كات

ئاوازێكه‌ ته‌نیا گه‌مژه‌كان له‌گه‌ڵیدا هه‌ڵده‌په‌ڕن.

 

كه‌ سه‌رسامى مێژوو بوویت

ده‌كه‌ویته‌ ستایش كردنى خۆت

گۆرانى بۆ شته‌ له‌ ده‌ستچووكانت ده‌چڕیت

پشت ده‌كه‌یته‌ ئاینده‌ و

ڕووت ده‌كه‌یته‌ سه‌راب

به‌وانه‌دا بزانه‌ كه‌ تۆ هیچت له‌ باردا نه‌ماوه‌!

 

منداڵێكى گریاوى ناو مێژوو

ده‌یه‌وێت ژیربێته‌وه‌

پیرێك له‌ ناو مێژوودا خه‌ونییه‌تى بمرێت

مردووه‌كانى ناو مێژوو

ئومێد ده‌كه‌ن حه‌شر بكرێن

حه‌شركراوه‌كانى ناو مێژوو

ده‌خوازن به‌ په‌نگى زه‌مان بوونایه‌ و

مێژوو نه‌بوونایه‌.

 

مێژوو بیرێكى قووڵه‌

بیری كوشتنى ئێستا

بیری له‌ چاڵنانى ئاینده‌.

 

دیواره‌كانى ناو مێژوو نابنه‌ به‌ربه‌ست

گیایه‌كانى كه‌س خۆشنود ناكه‌ن

گۆڕه‌پانه‌كانى مایه‌ى شه‌رمه‌زارین

مێژوو شتێك ده‌ڵێت، شتێكى بێ گیان

وه‌ك دیواره‌كانى

وه‌ك كێڵگه‌كانى

وه‌ك گۆڕه‌پانه‌كانى.

 

سواره‌كان له‌ مێژوودا

هه‌زاران جار گلان و

هێشتا نه‌بوون به‌ سوار

عاشقه‌كانى بوونه‌ته‌ تۆزى ده‌م –با- و

تێنه‌گه‌یشتن عه‌شق وانه‌یه‌ك نییه‌ فێری ببیت!

 

مێژوو نووسرایه‌وه‌

مندڵانى قوتابخانه‌ ئه‌زبه‌ریان كرد

بیر هه‌مووان هێنرایه‌وه‌

له‌ لاپه‌ڕه‌كاندا كه‌ڕ و پیر بوو

ددانه‌كانى كه‌وتن

قژی هه‌ڵوه‌رى

نه‌خۆشكه‌وت

مرد!

تكایه‌ تۆ پێم بڵێ: هیچ تۆزێك له‌ مردوو هه‌ڵده‌ستێت؟

 

له‌ كوێن قاره‌مانانى ناو مێژوو؟

له‌ كوێن عاشقانى ناو مێژوو؟

له‌ كوێن سوارچاكانى ناو مێژوو؟

له‌ كوێن قه‌ڵا و شوراكانى؟

له‌ كوێن له‌شكره‌ نه‌به‌زیوه‌كانى؟

ئه‌وان بۆ هه‌میشه‌ له‌ ناو لاپه‌ره‌كاندا نووستوون

پێكه‌ شه‌رابی ڕابردوو ده‌خۆنه‌وه‌

ئه‌وان نووستوون

ئه‌وان مردوون.

 

من به‌م شه‌وه‌ له‌ پاسێكدام

كه‌ پڕیه‌تى له‌ سه‌رنشینى به‌ ویقار

عه‌مامه‌ به‌سه‌ر

مێزه‌ر به‌سه‌ر

ته‌ڕبووش به‌سه‌ر

مشكى و جه‌مه‌دانى به‌سه‌ر.

 

له‌ پاسێكدام به‌م شه‌وه‌ من

پڕه‌یه‌تى له‌ سه‌رنشینى به‌ شكۆ

سه‌ڵته‌ له‌به‌ر

چۆغه‌ له‌به‌ر

مرادخانى له‌به‌ر

به‌رگیس له‌به‌ر.

 

به‌م شه‌وه‌ من به‌م شه‌وه‌

له‌ ئێستامه‌وه‌ ده‌فڕێت بۆ ئاینده‌

من ده‌زانم له‌ هیچ نووسینێكدا پاس نافڕێت!

به‌ڵام بۆ شیعر فڕین باشتره‌ له‌ ڕۆیشتن.

 

بۆ ئه‌وه‌ى گوێم له‌ سه‌رنشینه‌كان نه‌بێت

سه‌یرى ده‌ره‌وه‌ ده‌كه‌م

ده‌بینم مانگ ده‌بارێت

وابزانم مرۆڤ ده‌بارێت!

سه‌یرى ته‌نیشتم ده‌كه‌م

ژنێكى پیرى چاوهه‌نگوینى

سپیكه‌له‌ و قژ هه‌ورین

وه‌كو نه‌نكم دانیشتووه‌

به‌ قوڵیى ته‌ماشاى تاریكاییه‌كه‌ى ده‌ره‌وه‌ ده‌كات

له‌ چاوى ئه‌ودا ده‌ره‌وه‌ ڕه‌شاییه‌كى بێسنووره‌

كه‌ ئه‌م حه‌زده‌كات له‌ ناویدا نوقم ببێت.

 

من له‌به‌ر ئه‌وه‌نا كه‌ گه‌نجم

له‌به‌ر ئه‌وه‌ى حه‌زم به‌ هیچ شتێك نییه‌ -ڕوون-

دڵم به‌ هیچ شتێك خۆش نییه‌ –له‌به‌رچاو-

بۆیه‌ ڕوخسه‌ت له‌ ژنه‌ پیره‌كه‌ى ته‌نیشتم ده‌خوازم

ده‌ست درێژ ده‌كه‌م بۆ شووشه‌ ته‌م گرتووه‌كه‌ى به‌رده‌مى

به‌ فۆنتێكى لار و له‌وێر له‌سه‌رى ده‌نوسم: بژى نادیاریی.


ئەم بابەتە 49 جار خوێندراوەتەوە