Kani.jpg

"ببارێ"یەكی جیاواز!

كامەران سوبحان

كانی هونەرمەند، گوێگرەكانی وا ڕاهێناوە كە هەواڵی بەرهەمێكی نوێی بڵاودەبێتەوە بە خەیاڵ ریتم و شێوازی گۆرانی و بەرهەمەكانی لای خۆمان وێنا بكەین!

لە گۆرانیە سەرەتایەكانیەوە، بۆ پێش ئەلبومی "ببارێ" سكێچی میلۆدی و ئاواز و دەنگێك لە گوێماندابوە بوەتە ناسنامەی هونەریی كانی. بەڵام بە شێوەیەكی تەواو جیاواز، ئەم ئەلبومە نوێیەی "ببارێ"سەرجەم ئەو وێنانەی تێكدا و وێنایەكی نوێی لە خەیاڵ و گوێچكەماندا دروستكرد، دەبێت ئیدی لەم وێنا تازەیەوە، قسە لە دەنگ و ئاواز و تایبەتمەندی دەنگی كانی بكەین!

بنەمای جیاوازبونی ئەلبومی "ببارێ" لە چەند ئاستێكدایە:

1- تێكست: هەڵبژاردنی تێكستەكانی ئەم ئەلبومە، جیاوازە لە بەرهەمەكانی دیكەی خاتوو كانی. جیاواز، لەسەر بنەمای گوتن و ئاواز. شێركۆ بێكەس، گۆران و ناسری حوسامی، هیچ كامیان ئەو شاعیرانە نین، كە پێشتر لە یادەوەریمان وێنای شیعریمان كێشاون. جیاواز، تەواو جیاوازن لەم ئەلبومەدا.

2- دەنگ: میلۆدی و ئاوازی ئەم ئەلبومە، جیاوازیەكی تەواو پێچەوانەیە. بەشێكی گەورەی ئەو جیاوازیە، بۆ ئەو هێزە گەورەیەی میوزیك دەگەڕێتەوە، كە پردێكی پەڕینەوەیە لە میوزیكێكی لۆكاڵی كوردیی تاك شوناس، بەرەو میوزیكێكی فرە شوناسی جیهانی! بەجۆرێك لە گوێگرتن هەستدەكەیت، گوێ لە دەنگبێژ و هونەرمەندێكی بە ئەزمونی جیهانی دەگریت.بە پلەی یەكەم، ئەمەش بۆ ئەو توانا مەزنەی كارزان مەحمودی میوزیسیان دەگەڕێتەوە، كە لەپشت میوزیك و میلۆدییەكانی (كانی)یەوە.

3- ئاستێكی دیكەی ئەم ئەلبومە، تێكدانی ئەو وێنە باوانەیە كە گوێگرانی كانی، بۆ دەنگی ئەویان وێنا كردوە. كە پێشتر بە ریتمێكی باو، دەنگی ماملێ و خالقی و هۆمەر دزەیی بە جوانی دەگوتەوە، بەڵام ئەمجارە ئەو سكێچەی تێكدا و ریتمێكی نوێ و تایبەتمەندی بونیادنا.

4- هەمەچەشن و هەمەڕەنگی لە ریتمی گۆرانیەكان، لە میوزیكی مۆدێرنەوە بۆ گۆرانی پۆپ، هەمووی لەم ئەزمونە نوێیەدا هەیە و لە هەمویدا ئاستێكی باڵای هەیە.

5-داگیركاری هۆش: یەكێك لە تایبەتمەندیەكانی گۆرانی، داگیركردنی گوێگرە، تایبەتمەندی ئەم ئەلبومە، رێگەنادات بۆیەك چركەش، گوێگر داببڕێت لەو دەنگ و ئاوازە ئەفسوناوییەی كانی!

5- ئاسیاسێڵ پشتیوانی ئەم ئەلبومەی كردوەو ئێوارەی 1-6-2021 لە مەراسیمێكی تایبەت لەشاری سلێمانی بە فەرمی بڵاوبونەوەی ئەلبومەكە ڕاگەیەنرا.


ئەم بابەتە 124 جار خوێندراوەتەوە