Rozh.jpg

دێرێك دارستان و تاڵێك چۆله‌كه‌

دیوانێکی شیعری تازەی خاتوو "ڕۆژ هەڵەبجەیی" به‌مزوانه‌ چاپ و بڵاوده‌كرێته‌وه‌.

دێرێك دارستان و تاڵێك چۆله‌كه‌، نوێترین به‌رهه‌مى خاتوو "ڕۆژ هەڵەبجەیی"ه‌و وابڕیاره‌ به‌منزیكانه‌ له‌ دووتوێى (182) لاپه‌ڕه‌ چاپ و بڵاوبكرێته‌وه‌، ئه‌م به‌رهه‌مه‌ لە ئێستادا لە چاپخانەی کارۆ لەژێر چاپدایە.

ڕۆژ هەڵەبجەیی سەبارەت بەم کتێبە دەڵێت:

"لەناوەندی نەوەدەکاندا هاتمە نێو دنیای نووسین لەزۆربەی ڕۆژنامەوگۆڤارەکان شیعرم بڵاو کردۆتەوە هەتا ئێستا بەردەوامم لەنووسینی شیعری هاوچەرخی کوردی لەوەتەی دەستم کردووە بەنووسین هەتا ئێستا شەش کتێبی چاپکراوم هەیە، ئەمە دەبێتە حەوتەم کتێب، هیوادارم توانیبێتم کەلێنێکم پڕ کردبێتەوە لەئەدەبی کوردی.

لەم کتێبەدا، دەستم بردووە بۆ سێ شت قەسیدەی درێژ و پۆستەرو هایکو. لەهەر سێکیاندا ئەزمونی خۆم تاقیکردۆتەوە لەکاتێکدا ئەوانەی هایکستن هەر هایکو دەنووسن یان ئەوانەی شاعیرن هەر قەسیدەو پۆستەر دەنووسن ..نووسینی ئەم کتێبە جگەلەوەی هەڵگری شیعرییەتە لەشیعری نوێی کوردی، باکگراوندی فکرو فەلسەفەو مەعریفەی هەیە..ئەمەش دەگەڕێتەوە بۆ ئەوەی من خۆمم ستایلی خۆم هەیە .."

له‌ واڵى تایبه‌تى خۆشى له‌ تۆڕى كۆمه‌ڵایه‌تى فه‌یسبوك سه‌باره‌ت به‌م به‌رهه‌مه‌ نوسیویه‌تى:

"پاش ماندووبوونێکی زۆر کتێبی حەوتەمم دیزاین و بەرگی تەواو بووە پشت بەخوا ئێستا ئامادەی چاپە..هیوادارم بەم شیعرانەم کەلێنێکم پڕ کردبێتەوە لەنێو شیعری هاوچەرخی کوردی..کە چاپیش بوو لەهەموو شارەکان مەراسیمی بۆ دەکەم...

 

یه‌كێك له‌به‌رهه‌مه‌ شیعریه‌كانى ناو كتێبه‌كه‌:

 

خۆر تک تک تیرۆژی تێدەگرێ سەراپا،

جەستەی دەبێتە ورشەی زیوو

بەفر

دەبێتە گەڵای سپی بۆ درەختەکان،

چلورەش دەم و چاوی پێ دەشوا،

بەفر

کە سەما دەکا لەگەڵ هەناسەی (با)

ڕیشۆڵەکان فەرشی فڕین دەچنن

بەفر

*** *** ***

هەمیشە زیکر دەکات

لەسەر بەرماڵی گوڵ

پەپوولە

ڕاوی ڕووناکی دەکاو

خۆی دەبێتە نێچیر،

پەپولە

*** *** ***

تا چاو بڕکا،

شەمەندەفەری ئاسمانە،

بێ موسافیر..

دوکەڵ.

کتێب دەخوێنێتەوە

ماڵ پڕدەبێ لە چلچرا

ژن.

*** *** ***

ئەگەر کەوتنی نەبوایە،

گوڵ نەدەبووە دۆستی باخچە

باران.


ئەم بابەتە 139 جار خوێندراوەتەوە