Shwan.jpg

سەربوردەی ئەفغان عەرەبەكان - لەعەبدوڵڵا عەزامەوە تا ئوسامە بن لادن

شوان ئەحمەد

 ئەفغانستان یەكێكە لەو دەوڵەتانەی بووە قوربانی گەورەی جەنگی ساردو لەو ململانێیەی نێوان یەكێتی سۆڤێتی جاران‌ و وڵاتەیەكگرتووەكانی ئەمریكادا باجێكی زۆریدا.. تراژیدیای قووڵی ئەو وڵاتەش تائەمڕۆ هەر درێژكراوەی ئەو جەنگە خوێناوییەیە كەلەگەڵ هاتنی سوپای سوری سۆڤێتدا دەستیپێكردو لەگەڵ بەشداری راستەوخۆی وڵاتەیەكگرتووەكانی ئەمریكا و پاكستان‌ و چەند وڵاتێكی تریشدا زیاتر تاویسەند و گەرمتربوو.

راستە دروستبوونی میلیشیای ئیسلامی لەئەفغانستان‌ و سەرهەڵدانی ئەوەی بەجیهادی ئەفغانی ناودەبرێت مێژووەكەی دەگەڕێتەوە بۆ بەر لەداخڵبوونی سۆڤێتییەكان بەو وڵاتە، بەڵام لەنێوان ئەو دوو قۆناغەو ئەو دوو مێژووەدا جیاوازییەكی زۆرو بێحەدو حیساب هەیە..

بیركردنەوە لەدامەزراندنی میلیشیای ئیسلامی‌ و پێكهێنانی هێزێكی ئیسلامی لەو وڵاتەدا بەدرێژایی ماوەی حوكمڕانی زاهیرشا لەئارادا نەبوو، بەڵام هەر ئەوەندەی محەمەد داودخانی سەرەك وەزیرانی پێشووی ئەفغانستان بەیارمەتی سوپاو لە17ی تەممووزی 1973دا كۆدەتایەكی سەربازی لەو وڵاتەدا بەرپاكرد، ئیتر دەرگا بەڕووی دروستبوونی میلیشیا ئیسلامییە چەكدارەكاندا كرایەوەو سەرەتاكانیشی بەم شێوەیە دەستپێدەكات:

لەو قۆناغەدا زانكۆی كابۆل گۆڕەپانی ململانێی فیكری بوو لەنێوانی كۆمۆنیستەكان لەلایەك‌ و ئیسلامییەكانیش لەلایەكیترەوە، ئەوەی سەركردایەتی ئیسلامییەكانی دەكرد غوڵام محەمەد نیازی بوو كەڕاگری كۆلێژی شەریعە بوو لەزانكۆی كابۆل لەگەڵ ئەندازیار حەبیب رەحمان، بەڵام ئەمانە هەردووكیان دوای كودەتاكەی داودخان لەگەڵ ژمارەیەك هەڵسوڕاوی تریاندا دەستگیركران‌ و دوای ماوەیەك لەسێدارەدران.

دەستگیركردنی ئەمانە، هاوڕێكانیانی ناچاركرد بیر لەدامەزراندنی رێكخراوێكی چەكداری بكەنەوە بۆ بەگژاچوونەوەی دەسەڵاتی داودخان و دارودەستەكەی.. دیارترین كەسێكیش كاری بۆ ئەم مەسەلەیە دەكرد ئەحمەد شا مەسعود و گوڵبەدین حیكمەتیار بوون، ئەمانە لەگەڵ هێزێكی دیاریكراودا روویانكردە وڵاتی پاكستان‌ و لەشاری پیشاوەر كەدەكەوێتە سەرسنووری نێوان پاكستان‌ و ئەفغانستان دامەزران.

لەو سەردەمەدا زوڵفەقار عەلی بۆتۆ سەرۆكی پاكستان بوو، بۆتۆ مەبەستی لەگرتنە خۆی ئەم هێزە ئەفغانییەكان ئەوەبوو تا وەك كارتێكی فشار لەبەرامبەر دەسەڵاتدارانی كابوڵدا بەكاریان بهێنێت، چونكە لەو قۆناغەدا كێشەیەكی سنووری لەسەر ناوچەكانی بلوجستان ‌و پشتۆنستان لەنێوان پاكستان‌ و ئەفغانستاندا هەبوو، واتە بۆتۆ دەیویست ئەم هێزە وەك چەكێكی كاریگەر لەو كێشەیەدا دژ بەداودخان بەكاربهێنێ‌‌ و دەسكەوتێكی زیاتر لەو ناوچانە بۆ وڵاتەكەی بچڕێت.

بەڵام میلیشیا ئیسلامییەكەی مەسعود ‌و حیكمەتیار لەوە بچوكترو لاوازتر بوو كەبتوانێت لەئاست چاوەڕوانییەكانی بۆتۆدا بێت، یاخود توانای ئەوەی هەبێت رووبەڕووی دەسەڵاتدارانی وڵاتەكەی ببێتەوە. لەدوای دوو هێرشی سەرنەكەتوو لەڕۆژانی 26 و28/ تەممووزی/ 1975 بۆ سەر ولایەتی نەنجرهار ‌و دۆڵی بانجشێر، ئەو هێزە تووشی شكستێكی سەربازی گەورە هات‌ و سەرەنجامیش بووە مایەی دروستبوونی ناكۆكییەكی قووڵ لەنێوان شا مەسعود و حیكمەتیاردا.

بەدرێژایی چارەكەسەدەی رابردووش ئەم دوژمنایەتییەی نێوانیان لەقوڵبوونەوەدا بوو، كارێك كەبووە مایەی ئەوەی لەدوای كشانەوەی سوپای سووری سۆڤێتیش، ئەفغانستان ئارامی بەخۆیەوە نەبینێ‌ ‌و لەو سەروبەندەشدا بزوتنەوەیەكی توندڕەوی وەك تاڵیبان هەڵتۆقێ ‌‌و زەبری كاریگەر لەهێزەكانی حیكمەتیار و شا مەسعود‌ و باقی سەركردە ئەفغانییەكانی تر بووەشێنێ ‌‌و وڵاتیان لـێ پاكبكاتەوە. لەگەڵ كشانەوەی تەواوی ئەو هێزانە لەناو ئەفغانستاندا، ئیتر خاكی ئەو وڵاتە دەبێتە سەرزەمینی رمبازێنی تاڵیبان‌ و قاعیدەو ئەفغان عەرەبەكان.

ئەم كتێبە تەرخانە بۆ باسوخواستی چۆنێتی دروستبوونی ئەوەی لەكەناڵەكانی راگەیاندندا پێی دەوترێت ئەفغان عەرەبەكان و گرنگییەكەشی لەوەدایە كەبەپێنووسی شایەد حاڵێكی ناوجەرگەی رووداوەكانە، كەهەر لەسەرەتاوەو زۆر لەنزیكەوە ئاگاداری رووداوەكان بووە.

بوجومعە كەناسراوە بە عەبدوڵڵا ئەنەس ساڵی 1958، لەجەزائیر هاتۆتە دنیاوە. لەتەمەنی 25 ساڵییەوەو بەهۆی عەبدوڵڵا عەزامی رابەری روحی ئەفغان عەرەبەكانەوە، روودەكاتە پاكستان‌ و بەشداریەكی كاریگەری لەجیهادی ئەفغانییەكاندا دەبێت تا كشانەوەی سۆڤێتییەكان لەو وڵاتە. ئەنەس زاوای عەبدوڵڵا عەزامەو ئەندامێكی دیاری بەرەی ئینقازی ئیسلامی جەزائیریشە، هەنووكە پەنابەری سیاسییە لەئینگلستان‌ و ئەم كتێبەشی بەرهەمی ئەو ماوەیەیەتی كەلەئەفغانستاندا ژیاوە.

تاوسەندنی جیهادی ئەفغانی‌و پەیدابوونی دیاردەیەكی تازەی وەكی ئەفغان عەرەبەكان‌ و باسكردنی زۆریی دەنگوباسی ئەفغانستان لەكەناڵەكانی راگەیاندنی جیهاندا، تێكڕا پەیوەندییان بەو لەشكركێشییەی یەكێتی سۆڤێتەوە هەیە كە لە 27/ كانوونی یەكەمی/ 1979دا دەستیپێكردو لە 14/ شوباتی/ 1989دا كۆتایی هات.

ئەو هێزە ئیسلامییە بچوك ‌و لاوازەی ئەفغانییەكان كە لە ناوەڕاستی حەفتاكانەوە لەپیشاوەر گیریخواردبوو، توانای ئەنجامدانی بچوكترین چالاكی نەبوو لەودیو سنوورەكانەوە، لەسەرەتای هەشتاكانداو بەپێی پلانێكی موخابەراتی نێودەوڵەتی دەبێتە هێزێكی بەرفراوانی تۆكمەی چەكداركراو دەكەوێتە كێبەركێیەكی سەیر لەگەڵ دووەم گەورەترین زلهێزی جیهاندا كەئیمپراتۆریەتی سۆڤیەتی بوو.

بێگومان هەموو ئەوانەی كشانەوەی سۆڤێت لەئەفغانستان بۆ ئازایەتی ‌و قارەمانێتی ‌و لەخۆبوردەیی موجاهیدەكانی ئەوێ‌ دەگێڕنەوە، درۆیەكی گەورەمان بۆدەكەن ‌و راستی مەسەلەكەمان لێدەشێوێنن.. لەجەنگی دژەتیرۆردا رۆڵی بەرەی هاوپەیمانێتی باكوور چەند بوو لەڕووخانی دەسەڵاتی تاڵیبان لەو وڵاتەدا، هی موجاهیدە ئەفغانەكانیش لەدەرپەڕاندنی سوپای سووری سۆڤێتیدا هەر ئەوەندە بوو..

بۆ زانیاری زیاتر خوێنەر دەتوانێت بگەڕێتەوە سەر ئەم سەرچاوانە:

*نبیل شرف الدین: بن لادن، طالبان.. الافغان العرب والاممیة الاصولیة - مكتبة مدبولي، القاهرة - الطبعة الاولی، 2002.

*كۆرت لۆهبیك: جەنگی پیرۆز، سەركەوتنێكی ناپیرۆز، شاهید عەیانێك جەنگی نهێنی دەزگای موخابەراتی ئەمریكا CIA لەئەفغانستان دەگێڕێتەوە - وەرگێڕانی/ هێژا، پرۆژەی كتێبی دانسقە 5، سلێمانی، چاپی یەكەم، 2002.

*عبدالرحیم علي: اسامە بن لادن الشبح الذي صنعته امریكا - میریت للنشر والمعلومات، القاهرة - الطبعة الاولی، 2001.

لەم كتێبەشدا ئەنەس حاشا لەو راستییانە ناكات‌ و ئەوەتا دەڵێت:( هۆكارگەلێك دەستیان لەسەركەوتنی ئەفغانییەكاندا هەبوو، بەسەر یەكێتی سۆڤێتدا.. یەكێك لەوانە هۆكاری دەرەكی بوو كەڕۆڵی پاكستان لەڕیزی پێشەوەدا بوو، چونكە ئەو وڵاتە بووبووە بنكەیەكی پتەوی پشتەوەی موجاهیدە ئەفغانییەكان‌ و مەڵبەندی راهێنان‌ و چەكداركردنیان. هەروەها رۆڵی وڵاتانی عەرەبی ‌و ئیسلامی ‌و رۆڵی وڵاتانی خۆرئاواش نابێت لەبەرچاو نەگیرێت، بەتایبەتی‌ و لەسەرو هەموویانەوە وڵاتە یەكگرتووەكانی ئەمریكا كە لەڕووی سیاسی‌ و سەربازییەوە پشتیوانیكردن).

هەر سەبارەت بەم مەسەلەیە ئارسەر لۆری مامۆستای لێكۆڵینەوەی نێودەوڵەتی لەزانكۆی باشووری فلۆریدای وڵاتەیەكگرتووەكانی ئەمریكا، لەوتارێكیدا دەنووسێت ‌و دەڵێت: (لەسەروەختی جەنگی سارددا ئەمریكا لەشەڕی دژ بەكۆمۆنیستدا، ئیسلامی وەك هاوپەیمانێكی خۆی سەیردەكرد. بەو پێیەی حكومەتەكانی وڵاتانی ئیسلامی دژایەتییەكی توندی كۆمۆنیستیان دەكرد، ئەمریكا لەهەموو جێگایەك شەڕی شیوعییەتی كرد، رەنگە دوا شەڕیشیان ئەوە بووبێت كە لەئەفغانستاندا روویدا. لەو شەڕەدا موجاهیدەكانی ئەفغان بڕی سێ‌ بلیۆن دۆلاریان لە CIA وەرگرت، بەمەبەستی دەركردنی رووسەكانی لەوڵاتەیەكەیاندا.. دەزگاكانی راگەیاندن لەئەمریكا ئەو موجاهیدانەیان وەك قارەمان نیشانی گەلی ئەمریكاو جیهاندا كەخەبات لەپێناو ئازادیدا دەكەن).

بڕوانە:( ارثر لوري: ابعاد الحملة ضد الاسلام في الاعلام الامریكي، دراسة في الخطاب الصحفي) لەكتێبی (مستقبل الاسلام السیاسي/ وجهات نظر امریكیة، اعداد: د. احمد یوسف، المركز الثقافي العربي، بیروت، الطبعة الاولی، 2001، ص147).

بۆ بەرگرتن لەهەڕەشەكانی سوور و پاوانخوازی زیاتری سۆڤێتییەكان نەك لەپێناو چاوی كاڵی ئەفغانییەكاندا، هەریەك لەوڵاتەیەكگرتووەكانی ئەمریكا و عەرەبسانی سعودی و پاكستان، بڕیاری پێكێنانی بەرەیەكی بەرفراوانیاندا لەدژی دەسەڵاتی كرملین ‌و بۆ ئەو مەبەستەش هەموو رێگایەكیان گرتەبەر.

هەر لەتەیاركردنی میلیشیا ئیسلامییەكانی ئەفغانستانەوە بیگرە، تاپێكهێنانی هێزێكی نوێ‌ لەو عەرەبە خۆبەخشانەی روویان لەپاكستان كردبوو، بۆ بەشداریكردن لەجیهادی ئەفغانیدا. وەكو نەبیل شەرەفەدین باسی دەكات لەسەرەتای هەشتاكاندا، شاری پیشاوەری پاكستانی دەبێتە قیبلەگای زۆربەی زۆری گەنجانی عەرەب ‌و بەلێشاو روو لەوێ‌ دەكەن، تا وای لێدێت ناو لەو شارە دەنرێت سایگۆنی عەرەب. دیارترین سێ‌ كەسایەتییەك كەڕۆڵی بەرچاو‌ و كاریگەریان لەپرۆسەی دروستكردنی دیاردەی عەرەب ئەفغانەكاندا هەبووە، بریتیین لە: عەبدوڵڵا عەزامی فەلەستینی‌ و ئوسامە بن لادن و وائل جلێدانی سعودی).

عەبدوڵڵا عەزام كەدامەزرێنەر و رابەری فیكری ‌و حەرەكی ئەفغان عەرەبەكان بووە، یەكەمین كەسێكە لەسەرەتای هەشتاكانەوە بەئاشكرا داوای لەگەنجانی وڵاتانی عەرەبی ‌و ئیسلامی كردووە، دەست لەهەموو شتێكی خۆیان هەڵگرن ‌و روو بكەنە ئەو وڵاتە بۆ جیهادكردن.

بەبێ‌ تێگەیشتنیش لەو رۆڵە ترسناكەی ئەم پیاوە لەو قۆناغەدا گێڕاویەتی، ناتوانین مێژووی دروستبوون ‌و پەیدابوونی ئەوەی پێی دەوترێت ئەفغان عەرەبەكان بەشێوەیەكی راستودروست بنووسینەوە..

ئەم پیاوە ئەگەرچی فەلەستینی بوو، هاوكات ئەندامی ریزەكانی ئیخوان موسلمین بوو لەو وڵاتەو هاوڕێی نزیكی شێخ ئەحمەد یاسینیش بوو، بەڵام پشتی لەهەموو ئەوانە كردو بێباك بەكێشەو رووداوەكانی وڵاتەكەی روویكردە پاكستان‌ و خۆی بۆ مەسەلەی ئەفغانستان تەرخانكرد.

لەو بارەیەوە عەبدوڵڵا ئەنەس لەلاپەڕەی 36ی ئەم كتێبەیدا دەنووسێت:( شێخ عەزام تەنیا گرنگی بەكێشەی ئەفغانی دەدا.. لەو پێناوەشدا دەچوو بۆ عەرەبستانی سعودی ‌و لەمزگەوتەكانی ئەوێ‌ بەئاشكرا وتاری دەدا‌و ملیۆنەها دۆلاری بۆ جیهادی ئەفغانی كۆدەكردەوە.. هەربۆ ئەو مەبەستە هەموو ساڵێك سەردانی وڵاتە یەكگرتووەكانی ئەمریكای دەكردو باسی جیهادی ئەفغانی دەدا بەگوێی موسڵمانانی ئەوێدا).

عەبدوڵڵا عەزام هەر بەتەنیا دامەزرێنەری گروپی ئەفغان عەرەبەكان نەبوو، بەڵكو دەستی لەدروستكردنی پیاوێكی وەك ئوسامە بن لادنیشدا هەبوو. ئەوە دەتوانێت ئوسامە لەگەنجێكی دەوڵەمەندی شەرمنەوە بكاتە سەردەستەی هێزێكی ئسوڵی چەكدار، كەدواتر لەچوارچێوەی رێكخراوی قاعیدەدا خۆی بەیاندەكات‌ و جەنگێكی بێئامان لەدژی تەواوی دنیا رادەگەیەنێت..

بێگومان ئەو دوو كەسەی دەستیان لەدروستكردنی دیاردەی ئوسامە بن لادندا هەیەو لەماوەی بیست ساڵی رابردوودا چاوساغی بوون، سەرەتاكەی بە عەبدوڵڵا عەزام دەست پێدەكات‌ و دوای كوژرانیشی لەڕۆژی هەینی بەرواری 24/تشرینی دووەمی/1989 لەشاری پیشاوەر لەگەڵ هەردوو كوڕەكەیدا محەمەد‌ و ئیبراهیم، د. ئەیمەن ئەلزەواهری سەركردەی رێكخراوی جیهادی میسری، درێژە بەوكارە دەدات..

عەبدوڵڵا عەزام یەكێكە لەو كەسانەی ژیان‌ و تەنانەت مردنەكەشی تەلیسماوی و پڕی نهێنییە. وەك چۆن تائێستاش تیرۆركردنی خۆی ‌و دوو كوڕەكەی جێگەی پرسیارە، ئاوەها كاروانی ژیانیشی جێگای مشتومڕە.

كەس نازانێ‌ ئەم پیاوەی كە ساڵی 1941 لەجەنین هاتۆتە دنیاوەو هەر لەمنداڵییەوە پەیوەندی بەڕیزەكانی ئیخوان موسلمینەوە كردووەو ماستەر ‌و دكتۆرای لەزانكۆی ئەزهەر وەرگرتووە، بۆچی لەتەمەنی 26 ساڵیدا‌و لەگەرمەی شەڕی عەرەب - ئیسرائیل 1967، وڵاتەكەی جێدێڵێ‌ ‌و ئەو رێگایە ناگرێتەبەر كەشێخ ئەحمەد یاسین پیایدا دەڕوات. شێخ ئەحمەد یاسین دەمێنێتەوە، بەڵام ئەو وڵات جێدێڵێ ‌‌و دەڕوات، زۆر دوور دەڕوات، بەرەو پیشاوەر و كابوڵ و قەندەهار و دواجار هەر لەوێش سەردەنێتەوە.

عەزام یەكەم كەسە فەتوای ئەوەدەدات كەجیهاد لەئەفغانستان (فرض عین علی كل مسلم). لەوەش ترسناكتر ئەوەیە كەدەڵێت:( لابد ان یكون واضحا لدی المجاهدین انه اذا وصل المسلم الی ارض الجهاد لایجوز له تركها بحال الا ان یرتفع شهیدا الی ربه او منتصرا علی اعدائه، لیقوم بعده بنقل هذا الجهاد الی جبهة اخری حتی تطهر بلاد المسلمین من دنس الكفر). هەر لەدرێژەی فەتواكەیدا دەڵێت:( كما لایجوز للمجاهیدن ان یضعوا السلاح بعد ان رفعوه في وجه اعدائهم، ویتركوا الجهاد بحجە انهم سئموا من القتل والقتال واراقە الدما‌ء او أن احدهم غضب من امیر الجیهاد، كالذی یغضب من امام المسجد كما یقول الشیخ عزام لایجوز له ان یترك الصلاة نهائیا بحجە غضبه علیه، فهنا علیه ان ینتقل الی مسجد اخر و یصلی فیه ولایسقط عنه الفرض ابدا، وكذلك فی حال الجهاد لابد ان ینتقل الی مكان اخر یزاول فیه عبادة القتال).

بێگومان ئەمڕۆ دوای ساڵانێكی زۆر لەدەركردنی ئەو فەتوایانە، دەتوانین تارمایی ‌و دەرەنجامە ترسناكەكانی ئەو قسانە لەڕەفتار و كار و چالاكی ئەو گروپە جیهادی‌ و رادیكاڵیانەدا دەستنیشان بكەین كەلەپاش كشانەوەی لەشكری سۆڤێت لەئەفغانستان ‌و لەسەرەتای نەوەدەكانەوە لێرەو لەوێ‌ دروستبوون.

مەترسی گەورەی ئەفغان عەرەبەكان لەدوای تەوابوونی جیهادی ئەفغانی بەدوو شێوەیە:( یەكێكیان گەڕانەوەی هۆردوی ئەو موجاهیدانەیە بۆ وڵاتەكانی خۆیان، تا بەپێی فەتواكەی عەزام درێژە بەپرۆسەی جیهاد بدەن‌ و تراژیدیترین نموونەی ئەوانەش لەجەزائیردایە كەبەگەڕانەوەیان گەورەترین قەسابخانەیان لەو وڵاتەدا خوڵقاند. ئەوەی دیكەیان ئەوانەن كەلەناو رێكخراوی قاعیدەدا خۆیان رێكخستووەو ئوسامە بن لادن سەركردایەتیان دەكات‌ و بەرنامەیان كاری تیرۆریستی‌ و تێكدەرانەیە لەجیهاندا).

ئەڵبەتە دەسپێكی كاری ئەم رێكخراوە بەتەقاندنەوەی هەردوو باڵیۆزخانەی وڵاتەیەكگرتووەكانی ئەمریكا لەكینیا‌ و تانزانیا دەستیپێكردو لەڕووداوەكانی سێ‌ شەممەی رەشیشدا بازنەی شەڕەكەیان فراوانتركردو كارە ترۆریستیەكانیان گەیاندە ئەوپەڕی.

بەرلەوەی وڵاتەیەكگرتووەكانی ئەمریكا جەنگی دژەتیرۆر دەست پێبكات ‌و گورزی گورچكبڕ لەبزوتنەوەی تاڵیبان‌ و رێكخراوی قاعیدە لەناو ئەفغانستاندا بووەشێنێت، دەزگا پەیوەندیدارەكان سەرژمێری ئەفغان عەرەبەكانی ناو قاعیدەیان بەمجۆرە كردبوو:( 594 میسری، 410 ئوردنی، 291 یەمەنی، 279 سعودی، 255 عێراقی، 162 سوری، 217 جەزائیری، 311 سودانی، 63 تونسی، 53 مەغریبی، 32 فەلەستینی، 25 قەتەری، 20 كوەیتی، 16 بەحرەینی، 20 لیبیایی، 6 عومانی، 16 مۆریتانی، 20 سۆماڵی‌و ژمارەیەك چیچانی، فلیپینی، كورد، ئۆزبەكی، تورك، چینی‌ و.... هتد).

لەئاكامی شەڕی دژەتیرۆردا ژمارەیەكی زۆری لەوانە لەتۆرابۆرا و ناوچەكانی دیكەی ئەفغانستاندا كوژران‌ و ژمارەیەكی زۆرتریشیان بەدیلی گیران‌ و رەوانەی زیندانەكانی گوانتانامۆ كران، هەندێكیشیان بەوڵاتاندا بڵابوونەوە.

پێدەچێت شەڕی دژە تیرۆر سەرەتای كۆتایی گەلێك هێز و دەسەڵات‌ و دیاردەبێت، یەك لەوانەش دیاردەی ئەفغان عەرەبەكان بێت. ئەگەر ئەفغان عەرەبەكان پیشاوەر مەنزڵی لەدایكبوونیان بووبێت‌ و دەرەنجامێكی راستەوخۆی شەڕی ساردبن، ئەوا ئەمڕۆ پێدەچێت گوانتانامۆ دوامەنزڵی ئەوان بێت‌ و جەنگی دژەتیرۆر كۆتایی بەو پاشماوە كەمەشیان بهێنێت كەماون.

ئەفغان عەرەبەكان لەڕۆژگاری عەبدوڵڵا عەزامەوە تائوسامە بن لادن، سەرگەرمی نووسینەوەی مێژووی خوێن‌ و ترس ‌و تیرۆر و تۆقاندن بوون. لەئێستاشدا كەلاپەڕەی ژیانیان دەپێچرێتەوە كەس ئامادە نییە فرمێسكێكیان بۆ هەڵڕێژێت ‌و بۆ نەمانیان حەسرەتكێش بێت، تەنیا ئەوانە نەبن كە رقێكی گەورەیان لەژیان‌ و مرۆڤایەتییە.

 *كتێب: ولادة الافغان العرب - نووسەر: عبدالله انس - لەبڵاوكراوەكانی: دار الساقي، بیروت، چاپی یەكەم: 2002.


ئەم بابەتە 150 جار خوێندراوەتەوە