ئەم شیعرە لە پێشبڕکێی بیستەمین فێستیڤاڵی گەلاوێژ بەشدار بووە.

رەنگێ‌ ـ 1 ـ

من د زارۆكینییا خوە دا،

كۆمكێن ئاخێ‌ ب تبلێن خوە دروست دكرن،

ئەڤرۆ هەمی شین بوون،

بۆنە چیا

و بسەر مندا هەرفتن!

من د زارۆكینییا خوە دا،

دوو چپكێن شەربەتا هناران ب سینگێ‌ خوە دا رێتن،

ئەڤرۆ یێن بووینە دوو دارێن هناران

و رهێن وان، یێن د سینگێ‌ منرا دچن!

 

رەنگێ‌ ـ 2 ـ

وەكو هەڵامەتامە،

سڤیانووك ژ من دترسن،

لێ‌ خوە بۆ جارەكا ب تنێ‌ ژی من سڤیانووك ئازار نەداینە،

گۆنەها من چیە، كو مرۆڤان ئەز د چاڤێن وان دا ب ترس ئێخستیمە!

 

رەنگێ‌ ـ 3 ـ

هەر شەڤ ژ وەلاتی باردكم

و بەرەڤ ژوورا پەرتووكان دچم،

د ژوورا پەرتووكان دا هندەك كەس تێدا دژین،

ئەو كەس وەكو من د بێ‌ وەلاتن!

 

رەنگێ‌ ـ 4 ـ

بنڤە دەمژمێر،

تە دبینیین،

لێ‌ هەست ب تە ناكین.

ما كی ژ بلی دیواری هەست ب تە دكت؟

هەر تشتێ‌ ڤێ‌ جیهانێ‌ ب ڤی رەنگیە،

هەتا ئەم بزمارەكێ‌ ل سینگێ‌ وان نەدن؛

ئەو هەست ب مە ناكن!

 

رەنگێ‌ ـ 5 ـ

دگریم،

ژبەركو هندەك تشت یێن لبەر پێن من هەین،

ب دلۆپێن بارانێ‌ شوین نابن!

 

رەنگێ‌ ـ 6 ـ

تو وەكو وێ‌ گۆلبەرۆژێی،

یا هەمی سپێدەهیان پشتا خوە ددت رۆژێ‌

دەما ئێڤارییان رۆژ دهێت بەرامبەری وێ‌،

ئەو هزردكت رۆژ ژبەر وێ‌ یا زڤری.

 

رەنگێ‌ ـ 7 ـ

تو دبینی؟

خوە شكەفتێن ڤی چیایی ژی ژ مە حەز ناكن،

بەری ئەم بچن د واندا؛

وان تژی خوە ئاخ و بەركر!

 

رەنگێ‌ ـ 8 ـ

من دەستێن خوە ڤەكرن، دا بهێت دناڤ دەستێن من دا،

وێ‌ تژی دەستێن من چوونا خوە كر!

 

رەنگێ‌ ـ 9 ـ

ل پشت قۆتابخانا هە،

ئاڤاهییەك مەزن یێ‌ هاتی ئاڤاكرن،

د وی ئاڤاهیڤە، كەسەك یا د هەرفت،

ئەو كەس قۆتابخانا منە!

 

رەنگێ‌ ـ 10 ـ

پیربووم،

پشتا من چەمیا و بۆ پر،

كەقتە سەر رویبارەكێ‌،

ژ بلی گەنجاتییا من چ تشت د سەررا نەچوو!

 

رەنگێ‌ ـ 11 ـ

من تۆڤی گرنژینێ‌ د ڤێ‌ زەڤییێ‌ دا چاند،

چ هەڵامەتان د ناڤدا دروستناكم،

هەردەما شوین بوو؛

تێرا من و باڵندەیان هەیە.

 

رەنگێ‌ ـ 12 ـ

داپیرا وێ‌ هەردەم دگۆت:

تو دەستێ‌ من یێ‌ راستێی و ئەو یێ‌ من یێ‌ چەپێ‌ یە.

چەند كەیفخۆش دبووم دەمێ‌ داپیرا وێ‌ نڤێژ دكر

و دەستێ‌ خوە یێ‌ راستێ‌ ددانا سەر یێ‌ چەپێ‌!

ئەم بابەتە 71 جار خوێندراوەتەوە