241904803_857218278496885_2430028445856038991_n.jpg

هه‌موو گه‌ڕانێك بۆ لابردنى تاریكییه‌.

 

د. موحسین ئەحمەد عومەر نووسەر و وەرگێڕ و مامۆستای زانکۆیە. ئەو بە وەرگێڕانە زیندو جیاوازەکانی لەبواری ئەدەبیاتدا دەناسرێتەوە. بۆخۆی پردێکی خاکەڕا و ئامادەیە لەنێوان ئەدەبی فەڕەنسی و کوردیدا. 

ئەمەی خوارەوە، چیرۆکێکی ئەوە کە ورد و تێکەڵ بە زەینییەتێکی نووسەرانە تیایدا دەگێڕێتەوە و لە کارەکتەر سازی و فەزاسازیدا تا ئەندازەیەکی زۆر نزیکدەبێتەوە لەو گێڕانەوە جیاواز و دڵخوازانەی لە جیهانی ئەدەبیاتدا و لای نووسەرانی گۆڤاری  (کۆمینیکەیشن  ١٩٦٦) بەتایبەت ئامادەیی هەبوو. 

 

ئەمەی خوارەوە چیرۆکەکەیە:

 

له‌و بڕوایه‌دام ده‌بێ ئه‌م دیارده‌یه‌ كێشه‌یه‌كى زۆر كۆن بێ، به‌ راده‌یه‌ك كۆن بێ مرۆڤ بۆ خۆى وێڕاى سه‌ر لێ شێوان نه‌زانێ مێژووه‌كه‌ى بۆ كه‌ى ده‌گه‌ڕێته‌وه‌، مێژووێك خۆى له‌ ناو تاریكى شاردبێته‌وه‌، له‌ بنچینه‌شدا هه‌موو گه‌ڕانێك بۆ لابردنى تاریكییه‌. راستییه‌كه‌ى تاریكى و رووناكى مێژووێكیان هه‌یه‌ و به‌ درێژایى مێژووى مرۆڤ ئه‌م دوانه‌ش ئاماده‌ییان هه‌بووه‌، ره‌نگه‌ كێشه‌ى رووناكى ئه‌وه‌نده‌ ئاڵۆز نه‌بێ به‌ قه‌د ئه‌وه‌ى كه‌ تاریكى سه‌رى له‌ مرۆڤ شێواندووه‌، ئه‌مه‌ش لێكدانه‌وه‌ و به‌دواداچوونى ده‌وێ. به‌ گشتى ئه‌م هه‌سته‌ كه‌ بابه‌تى ئه‌م چیڕۆكه‌یه‌، گه‌ڕانه‌وه‌ بۆ مێژووه‌كه‌یى و ده‌رهێنانى سیما و خه‌سڵه‌تى له‌ ناو تاریكى ره‌نگه‌ بایه‌خێكى ئه‌وتۆى نه‌بێ، به‌ قه‌د ئه‌وه‌ى پێویسته‌ زیاتر له‌ سه‌ر هه‌سته‌كه‌ خۆى قسه‌ بكه‌ین، كه‌ هه‌رده‌م، هه‌تا له‌ ئاینده‌ش وه‌ك پرسیارێك ده‌مێنێته‌وه‌. ره‌نگه‌ پرسیارى ئه‌وه‌ بكرێ ئه‌م هه‌سته‌ چییه‌ كه‌ خۆى له‌ ناو تاریكى شاردۆته‌وه‌. ئه‌مه‌ش سه‌ره‌تاى هه‌موو پرسیارێكه‌ له‌م باره‌یه‌وه‌، كه‌ بێگومان وردبوونه‌وه‌ و شۆڕبوونه‌وه‌ى ده‌وێ. مه‌سه‌له‌كه‌ زۆر ساده‌ و ساكاره‌، ئه‌و بۆ خۆى ئه‌وه‌نده‌ خۆشده‌وێ، بۆ من ئه‌وه‌نده‌ خۆم خۆش ناوێ ؟ ئایه‌ كه‌ ئه‌و ئه‌مه‌نده‌ خۆى خۆشده‌وێ، مه‌سه‌له‌كه‌ ئه‌وه‌ نیه‌ داوا ده‌كا وه‌ك بوونه‌وه‌رێكى تایبه‌تى و ناوێزه‌ سه‌یر بكرێ ؟! هه‌موو له‌به‌ر پێى بووه‌ستن و كڕنووشى بۆ به‌رن، به‌ یه‌ك ده‌نگ و یه‌ك ئاواز هوڕاى بۆ بكێشن، كڕنووش، كڕنووش، كڕنووش، كڕنووشى بۆ به‌رن، هه‌موو جیهان له‌ كڕنووش خۆى ده‌نوێنێ، ئه‌و بۆته‌ خوایه‌ك و ئیتر تازه‌ ده‌بێ تا دوا دڵۆپ خوێنى خۆى خه‌بات بكا له‌ پێناوى خۆخۆشویستن و به‌ ئه‌نجام گه‌یشتن. ئه‌مه‌ش مێژووه‌كه‌ى ده‌گه‌ڕێته‌وه‌ بۆ چركه‌یه‌كى زۆر سه‌رنجڕاكێشى ئه‌وه‌نده‌ مه‌زن به‌ قه‌د چوونه‌ سه‌رمانگ گرینگ بوو، به‌ڵام ته‌نیا له‌ ژیانى ئه‌و، كه‌ دواتر ژیانى ملیۆنه‌هاى به‌ره‌و بێده‌نگى برد. كه‌ منداڵ بوو، باشتر كه‌ هێشتا هه‌رزه‌كار بوو، تازه‌ سمێڵى داده‌نا، رۆژێك وێنه‌ى خۆى له‌ ناو ئاوێك بینی كه‌ وه‌ك ئاوێنه‌یه‌كى پاك سازگار بوو، ئاوه‌كه‌ به‌ گژوگیا و ورده‌ به‌ردى ره‌نگاو ڕه‌نگ ده‌وره‌ درابوو، له‌وسه‌ره‌وه‌ ئاوێكى باریك ده‌ڕژایه‌ ناوى، ته‌نیا تۆزێك له‌ نزیك سه‌رچاوه‌كه‌ى لێل بوو، له‌وێ وێنه‌كه‌ى خۆى به‌ شكاوه‌یى ده‌بینى، به‌ڵام له‌ قووڵایى ئاوه‌كه‌ وێنه‌كه‌ى زۆر پوخت و ساف و جوان بوو، به‌ راده‌یه‌ك جوان بوو، راسته‌وخۆ موچڕكى گه‌رم گه‌رم به‌ هه‌موو له‌شیدا ده‌هات، حه‌زى ده‌كرد ئه‌وه‌ى ناو ئاوه‌كه‌ بگرێ و رایمووسێ و تێكه‌ڵى گیانى بێ، بوونه‌وه‌رێكى ناوێزه‌ و سروشتێكى بێ پایان بوو، دوو چاوى شینى گه‌وره‌ى هه‌بوو، ئاوه‌كه‌ ئه‌وه‌نده‌ مه‌نگ بوو ده‌تگوت به‌ ئه‌نقه‌ست ئۆقره‌ى گرتووه‌ و ناجووڵیته‌وه‌، باشى نایێ، بۆ ئه‌وه‌ى ئه‌و به‌ جوانى شین و سپیاتى چاوى ببینێ، پیستێكى مه‌یله‌و بڕۆنزى، قژێكى كاڵى مه‌یڵه‌و زه‌رد، دیمه‌نى گشتى زیاتر به‌ سیماو قه‌ڵافه‌ت و جوانى ئه‌و پاڵه‌وانانه‌ ده‌چوو كه‌ له‌ ئه‌ده‌بیاتى یۆنانى و رۆمانى وه‌ك سیفه‌تێك ده‌یاندا مرۆڤى نموونه‌یى و پاڵه‌وانه‌كانیان، مرۆڤى ئیدیال، ئه‌وانه‌ى له‌ ناو جۆرێك له‌ پوخته‌یى جه‌سته‌یى و ده‌روونى ده‌ژیان، له‌ سه‌ركه‌وتنێكه‌وه‌ بۆ سه‌ركه‌وتنێكى تر ده‌چوون، ئه‌ویش به‌م شێوه‌ خۆى ده‌هاته‌ به‌رچاو، ئه‌فسووناوى، پڕ له‌ ویست و حه‌ز و ئاماده‌یى، باوه‌ڕى نه‌ده‌كرد ئه‌وه‌ى ناو ئاوه‌كه‌، وێنه‌كه‌ى خۆیه‌تى، له‌م گومانه‌ (منى نووسه‌ر پێم وایه‌ راست ده‌كات، چونكه‌ ئه‌وه‌ى ناو ئاوێنه‌ هه‌مان ئه‌و كه‌سه‌ نیه‌ كه‌ ته‌ماشاى ده‌كا، ئه‌مه‌ جیاوازییه‌كه‌ى وه‌ك هه‌قیقه‌ت و خه‌ون وایه‌) به‌ڵام راست بوو ئه‌مانه‌ هه‌مووى خه‌ون بوون، چونكه‌ ئه‌و ئێستا جل وبه‌رگى سوپایى له‌به‌ره‌، كه‌مێكیش كه‌وتۆته‌ ناو ساڵه‌وه‌، به‌ڵام ئه‌م خه‌ونه‌ى هه‌رده‌م له‌ یاده‌ و هه‌موو به‌یانیه‌ك به‌ بیرى دێته‌وه‌ كه‌ له‌سه‌ر ئاوه‌كه‌ دووچارى خۆشه‌ویستى خۆى بوو (هه‌ندێ جاریش له‌م هه‌سته‌ بێزار ده‌بوو، حه‌زى ده‌كرد خۆى بشارێته‌وه‌) سه‌ره‌نجام هه‌موو دنیا ده‌بێ ئه‌م هه‌سته‌ و ئه‌م خه‌ونه‌ى ئه‌و بزانن، ستایشى بكه‌ن، ئینجا بۆ دۆزینه‌وه‌ى شكۆمه‌ندى به‌ چاوێكى زۆر مه‌زن سه‌یرى جل و به‌رگه‌ سوپاییه‌كانى خۆى ده‌كرد، وه‌ك به‌رگى سوپایى یۆنانى و رۆمانه‌ كۆنه‌كان ده‌هاته‌ به‌رچاو، كه‌ ده‌یپۆشى، به‌ خێرایى و به‌ ڕێكى ده‌ڕۆیشت، سه‌رى به‌رزده‌كرده‌وه‌ و سینگى بۆ پێشه‌وه‌ ده‌برد و قاچه‌كانى توند له‌ زه‌وى ده‌كوتا، هه‌ر كوتانێكى وه‌ك ئه‌وه‌ وابوو دینگه‌یه‌كى گه‌وره‌ى شه‌ش حه‌وت مه‌ترى به‌رز له‌ زه‌وى بكوترێ، له‌ بن پێى زه‌وى له‌سه‌ر هێڵى سووڕانه‌وى خۆى به‌رامبه‌ر به‌ خۆر چه‌ند سه‌د مه‌ترێك ده‌چووه‌ ده‌ره‌وه‌ و ده‌هاته‌ ژووره‌وه‌، به‌مه‌ش بوومه‌له‌رزه‌یه‌كى گه‌وره‌ى به‌رپا ده‌كرد، هه‌زاران خانوو ده‌ڕووخان، ده‌یان رووبار و ده‌ریا فرتۆنه‌یان ده‌كرد و به‌ شاڵاوى گه‌وره‌ گه‌وره‌ وشكاییه‌كانى ده‌وروبه‌ریان نغرۆى بن ئاو ده‌كرد. دواى به‌رزكردنه‌وه‌ى پله‌ى سوپایى، كه‌ وه‌ك پاداشێكى خودایى سه‌یرى ده‌كرد، بۆ خۆپیشاندان و گه‌یاندنى ترسى ده‌سته‌ڵاتى خۆى بۆ ئه‌وانى تر، له‌ شه‌قامه‌ گه‌وره‌كان مارشى سوپایى رێكده‌خست، خۆى له‌ پێشه‌وه‌ ده‌ڕۆیشت، هه‌زاران هه‌زار سوپایى له‌ دواوه‌ى ده‌ڕۆیشتن و شه‌قام كۆڵانه‌ به‌رینه‌كانى شاریان ته‌ى ده‌كرد، به‌ ڕاى ئه‌و، ئه‌م مارشانه‌ به‌ پله‌ى یه‌كه‌م بۆ پیشاندانى جوانى و ئوبهه‌ت بوو به‌ ئه‌وانى تر. یه‌كێك له‌ شكۆمه‌ندییه‌كانى بریتى بوو له‌ كوشتنه‌وه‌ى هه‌زاران سه‌ر مه‌ڕ و گاو و گۆلك، ئه‌مه‌ى به‌ داهێنانى خۆى داده‌نا، ده‌یگوت با هه‌ژاران له‌ گۆشت تێر بخۆن، هه‌ندێ جاریش به‌ كوڵ ده‌گریاو ده‌ریایه‌ك فرمێسكى ده‌ڕشت، به‌ ده‌م قوڵپى گریانه‌وه‌ ده‌یگوت : من چۆن دڵم، ویژدانم ئۆقره‌ ده‌گرێ تا یه‌ك منداڵى ئه‌م وڵاته‌ گوڵ گونه‌ ئێواران له‌ برسان گیانه‌ڵا بداو منیش له‌ دیار مێزێكى چه‌ند سه‌د مه‌ترى پڕ له‌ خواردن و خواردنه‌وه‌ى ره‌نگاو ڕه‌نگ له‌گه‌ڵ هاوكارانم به‌رمه‌ سه‌ر. ئاخر ئه‌و دڵى پڕ له‌ خۆشه‌ویستى بوو، ئه‌مه‌ش مێژووێكى هه‌بوو، به‌ قه‌د خۆر و مانگ و گه‌ردوون كۆن بوو.
له‌گه‌ڵ نه‌یاره‌كانیشى هه‌ر به‌ خۆشه‌ویستى قڕانى تێده‌خستن، هه‌موو ئێواره‌یه‌ك چه‌ند لاشه‌یه‌كى له‌ ده‌رگاكانى شار هه‌ڵده‌واسى، كه‌س جورئه‌تى نه‌ده‌كرد لێیان بكه‌نه‌وه‌، دواجار هه‌ر خۆیان سوپاییه‌كان، ده‌ست و پێوه‌ندى ئه‌و پیاوه‌ى خۆى خۆشده‌ویست ده‌هاتن لێیان ده‌كردنه‌وه‌ و له‌و ناوه‌ توڕیان هه‌ڵده‌دان. شه‌و به‌ پانه‌ دزه‌ خاوه‌نه‌كانیان ده‌هاتن، ده‌یانبردنه‌وه‌ و له‌ گونده‌ دووره‌كان به‌ شێوه‌یه‌كى شایسته‌ ده‌یان نێشتن.
***
لێره‌وه‌ پێویسته‌ جارێكى تر بگه‌ڕێینه‌وه‌ بۆ كێشه‌ى به‌رایى، هه‌ڵبه‌ت بۆ پیشاندان و وه‌ڵامدانه‌وه‌ى پرسیاره‌ سه‌ره‌كییه‌كه‌ : ئه‌و بۆ خۆى خۆشده‌وێ ؟ له‌مه‌ش ده‌بێ باس له‌ خه‌ونێكى تر بكه‌ین كه‌ به‌ لاى نووسه‌ر زۆر گرینگتره‌ له‌ چاو كێشه‌ و مێژووى خۆخۆشویستنه‌كه‌، ئه‌مه‌ش بریتیه‌ له‌ رووداوێكى تر كه‌ دیكتاتۆر ده‌یوست به‌ هه‌موو دنیاى بگه‌یه‌نێ، ئه‌م خه‌ونه‌ش بریتییه‌ له‌ به‌رجه‌سته‌كردنى خه‌ونى به‌رایى، ده‌یویست ئه‌و رۆژه‌ كه‌ له‌ ناو ئاوه‌كه‌ هه‌ستى به‌ چ جوانیه‌ك و شاگه‌شكه‌بوونێك و شكۆمه‌ندییه‌ك كردبوو، به‌ شێوه‌یه‌كى به‌رجه‌سته‌ له‌ پێش خۆى ببینێ، ئه‌مه‌ش تا راده‌یه‌ك مه‌حاڵ بوو، به‌ڵام جێ به‌جێ كردنى خه‌ونه‌كان و هێنانه‌دییان یه‌كێ له‌ خه‌سڵه‌ت و فه‌زیله‌كانى ئه‌و بوو، بۆیه‌، رۆژێك داواى له‌ هه‌موو هونه‌رمه‌نده‌ په‌یكه‌رتاشه‌كان كرد له‌ كۆشك ئاماده‌ بن. داواى لێ كردن هه‌ر یه‌كه‌ى په‌یكه‌رێكى ئه‌و دروست بكه‌ن، ئه‌مه‌ش به‌ له‌به‌ر چاو گرتنى یه‌كه‌م خۆدیتن و خۆ خۆشویستنى، دووه‌م تێخستنى دیمه‌نى ئه‌و به‌ به‌رگى سوپایى كاتێ كه‌ له‌ پێشه‌وه‌ى سوپاكه‌ى ده‌ڕوا له‌گه‌ڵ هه‌نگاوه‌كانى زه‌وى ده‌له‌رزێ و زه‌ریاو رووباره‌كان هه‌ڵده‌ستن و ده‌شت و ده‌ر پڕ له‌ غوبار ده‌بن و شاران نغرۆ ده‌بن و سه‌ر له‌ نوێ بۆ به‌یانى ئه‌و دروستیان ده‌كاته‌وه‌. ده‌بوایه‌ له‌ دروست كردنى هه‌ر په‌یكه‌رێك هه‌ست به‌م دوو حاڵه‌ته‌ بكا. ده‌بوایه‌ هونه‌رمه‌ندان ئه‌م دوو شته‌ تێكه‌ڵ بكه‌ن و مۆڵه‌تیش ته‌نیا یه‌ك مانگ بوو. رۆژى پێنجه‌مى مانگى گوڵان كه‌ هێشتا به‌هار له‌وپه‌ڕى لاوێتى خۆى بوو، خۆر تیشكى زێڕینى ده‌به‌خشییه‌وه‌، هه‌موو په‌یكه‌ره‌كان ده‌بێ له‌ هۆڵى گه‌وره‌ى كۆشكه‌كه‌ى ئاماده‌بن، به‌یانى رۆژى دوایى كه‌ ده‌رگاى مه‌زنى هۆڵه‌كه‌ ده‌كاته‌وه‌ پێشانگا ئاماده‌ بێ و په‌یكه‌ره‌كان ببینێ.
له‌گه‌ڵ ده‌رگا كردنه‌وه‌ى هۆڵه‌كه‌، كه‌ درێژییه‌كه‌ى سه‌د مه‌ترێك ده‌بوو و پانیه‌كه‌شى شه‌ست مه‌ترێك، زیاتر له‌ سه‌د په‌یكه‌ر دانرابوون، هه‌ر په‌یكه‌رێك له‌سه‌ر چوارگۆشه‌یه‌كى په‌نجا به‌ په‌نجا دانرابوون. دوورى نێوان په‌یكه‌رێك و په‌یكه‌رێكى تر نزیكه‌ى دوو مه‌ترێك ده‌بوو. كه‌ پێى له‌ ژوورێ دانا راسته‌وخۆ سه‌یرى یه‌كه‌م په‌یكه‌رى كرد، گۆپاڵێكى ره‌شى بریقه‌دارى له‌ ده‌ست بوو، هه‌ر په‌یكه‌رێك، دواى وه‌ستان و سه‌یركردنى ئه‌گه‌ر به‌ دڵى نه‌بایه‌ راسته‌وخۆ به‌ گۆپاڵه‌كه‌ى ده‌ستى پاڵى پێوه‌ ده‌ناو به‌رى ده‌دایه‌وه‌، ئه‌وانه‌ى له‌ دواوه‌ى بوون یه‌كسه‌ر بێ ئه‌م لاو ئه‌ولا له‌ په‌نجه‌ره‌وه‌ فڕێیان ده‌دا خواره‌وه‌. به‌ڵام ئه‌و خۆى له‌ ناو هیچ كامێكیان نه‌دۆزییه‌وه‌، هه‌ستى به‌ دیمه‌نى سه‌ر ئاوه‌كه‌ نه‌ده‌كرد، هه‌ستى به‌ زه‌مین له‌رزه‌ و شكۆمه‌ندى مارشه‌كانى نه‌ده‌كرد...، تا دواجار تاقه‌ یه‌ك په‌یكه‌ر مابووه‌وه‌، ئه‌مه‌ش دوایین په‌یكه‌ر بوو، نیوه‌ په‌یكه‌رێك بوو، له‌ به‌رامبه‌رى دووچارى عه‌شقێكى سه‌یر و ناوێزه‌ بوو، گیانى كه‌وته‌ هه‌ڵچوون و هه‌ڵایسان، خۆى له‌ ناو هه‌مان هه‌ڵكه‌وتى پێشووى هه‌رزه‌كارى دۆزییه‌وه‌، هه‌مان خه‌ون، هه‌مان ئاوێنه‌، هه‌مان سه‌رسام بوون. له‌ ناكاو خۆى پێ رانه‌گیرا و دایه‌ قاقاى پێكه‌نین، له‌ ناو هۆڵه‌ گه‌وره‌كه‌ ئه‌م سه‌ر و ئه‌و سه‌رى ده‌كرد، له‌ خۆشیان شاگه‌شكه‌ بوو بوو، ده‌هاته‌وه‌ لاى په‌یكه‌ره‌كه‌ و دوور ده‌كه‌وته‌وه‌، نیوه‌ په‌یكه‌ره‌كه‌ شتێكى نایاب و ده‌گمه‌ن بوو، یه‌ك پارچه‌ هونه‌ر و خه‌ون بوو، له‌ به‌ردى مه‌ڕمه‌ڕى سپى و پته‌و داتاشرابوو، له‌ هاتووچوونه‌كانى ده‌یوت له‌ ئه‌زه‌له‌وه‌ من له‌ ناو ئه‌و به‌رده‌ ده‌ژیم، ده‌بوایه‌ یه‌كێك بێ ده‌رم بهێنێ، سه‌ره‌نجام ئه‌مه‌ته‌ خۆم له‌ پێش خۆمم. هه‌موو شتێكى پوخته‌یه‌، چاو، گه‌رده‌ن، مل، لووت، شێوازى وه‌ستان و روانین، هه‌مان كه‌سى ناو ئاوێنه‌كه‌یه‌، هى ناو ئاوه‌كه‌یه‌، ده‌مێكه‌ ئه‌و به‌ دواى وێڵه‌. دواجار وه‌ك توحفه‌یه‌كى هه‌نه‌رى مه‌زن، بڕیارى دا، ته‌نیا ئه‌م په‌یكه‌ره‌ له‌ ناوه‌ڕاستى هۆڵكه‌ دابنرێ، له‌ ده‌رگاوه‌ تا لاى په‌یكه‌ره‌كه‌ مافوورێكى سوورى تێرى راخست، ئه‌مه‌ش هه‌ڵبه‌ت وه‌ك شایان لێنانێك.
داواى كرد به‌ زووترین كات هونه‌رمه‌نده‌كه‌ى بۆ بهێنن بۆ رێزلێنان و پاداش كردن. زۆر به‌ خێرایى پیاوه‌كانى به‌ چاو تروكانێك هونه‌رمه‌ندیان گه‌یانده‌ پێشى، له‌ هۆڵێكى بچوكتر له‌ پشت مێزێك دانیشتبوو، كه‌ له‌ دار ئه‌به‌نوس دروستكرابوو، زۆر پوخته‌ و جوان و ساده‌ بوو، لێواره‌كانى زۆر رێك و دیار بوون، هیچ شتێكى له‌سه‌ر نه‌بوو، ته‌نیا چه‌ند لاپه‌ڕه‌یه‌كى سپى و قه‌له‌مێك و قه‌ڵه‌مدانێك، له‌ پشته‌وه‌ش ئاگردانێك له‌ مه‌ڕمه‌ڕ و په‌یكه‌رێكى بچووكى ڤینۆس له‌ گۆشه‌ى لاى چه‌پ دانرابوو. هونه‌رمه‌ند به‌م دیمه‌نه‌ پوخته‌ و ساده‌یه‌ زۆر شاگه‌شكه‌ بوو بوو، واى ده‌زانى و له‌ خه‌یاڵى خۆى واى دانابوو ئه‌و ده‌بێ له‌سه‌ر مێزێكى شاهانه‌ى له‌ زێر و زومرود دانیشتبێ، ژووره‌كه‌ى پڕ بێ له‌ قه‌نه‌فه‌ و په‌رده‌ و مافوورى ئاوریشمین، به‌ پێچه‌وانه‌وه‌ ئه‌و دیمه‌نێكى زۆر ساده‌ى تا راده‌ى ئه‌بستراكت بینى. له‌ پشت مێزێكى ساده‌ى نایاب و هۆڵێكى چۆڵ و هۆڵ دانیشتبوو. سه‌ره‌نجام پاش كه‌مێك چاوى هه‌ڵێناو سه‌یرێكى هونه‌رمه‌ندى كرد، كوڕێكى لاوى چاو شین، قژێكى درێژى مه‌یله‌و زه‌رد كه‌ به‌سه‌ر شانه‌كانیدا شۆڕبووبوونه‌وه‌، پێستێكى سپى مه‌یله‌و بڕۆنزى هه‌بوو، قه‌ڵافه‌تێكى رێك و پوخته‌، له‌ ته‌ماشاكردنى هونه‌رمه‌نده‌كه‌ هه‌ستى به‌ هه‌مان خۆبینین و خۆدۆزینه‌وه‌ى ناو ئاوه‌كه‌ى سه‌رده‌مى هه‌رزه‌كارى كرد، سپیاتى و شینى گڵێنگه‌ى چاوى هونه‌رمه‌نده‌كه‌ هه‌مان ئه‌وه‌ى خۆى بوو كه‌ پێشتر بینیبووى، هه‌مان خه‌ون و هه‌مان موچركه‌. هه‌ستى ده‌كرد ئه‌وه‌ى ده‌یبینێ له‌ خه‌ون و ئه‌فسانه‌ زیاتر نیه‌، ده‌شێ راستیش بێ، پاشان له‌ ناكاو هه‌ڵچوو و سوور بووه‌وه‌، به‌ هێز مستێكى له‌ مێزه‌كه‌ دا و قیت بووه‌وه‌، وێڕاى هاواركردن به‌سه‌ر هونه‌رمه‌ند گوتى:
- تۆ چیت ته‌حه‌داى من بكه‌ى، پێم بڵێ تۆ چیت، تۆ كێیت؟!
سه‌فته‌یه‌ك پاره‌ى گه‌وره‌ى فڕیدایه‌ پێش هونه‌رمه‌ند و پێى گوت : فه‌رموو ئه‌مه‌ش ده‌ست هه‌قى كاره‌كه‌ت. داواى له‌ پیاوه‌كانى كرد به‌ شه‌ق و پێلاقه‌ له‌ كۆشكى ببه‌نه‌ ده‌ره‌وه‌، هونه‌رمه‌ند تا گه‌یشته‌ ده‌ره‌وه‌ى كۆشك و فڕیاندایه‌ سه‌رجاده‌كه‌ ته‌نیا ده‌یتوانى هه‌ناسه‌ بدا، به‌ڵام هه‌موو ئه‌مه‌ له‌ خه‌ون، وڕێنه‌یه‌ك، خه‌یاڵێك زیاتر نه‌بوو كه‌ له‌ چركه‌یه‌كدا به‌ مێشكى چیڕۆكنووسدا هات.


ئەم بابەتە 269 جار خوێندراوەتەوە