242121524_1269093993554111_6559721647244804725_n.jpg

نهێنی هەناسە کانم

هەنار موفتی

 

چیتر لەپەنجەرە تەڵخ و...

تەماویەکان بۆ نیگاکانت ناڕوانم !

ئیدی زمانم گۆ ناکا وەک جاران

پەردەی شەرم

لەسەر رووخسارم رادەماڵم

هەموو ئەو گرێ کۆێرانە دەکەمەوە

کە رۆژگارەکان بۆیان هێنام!

پاییز ئەکەمە خەڵوەتێک

تا هەنسکە ژانی بێ ئٔۆقرەیم

بدا بەدەم (با)دا

ئٔیتر نایەڵم

زەردە خەنەکانت بمخواتەوە

گۆێ بۆ چرپە نەفرەت لێکراوەکانت ناگرم

نابم بە بەهارت

تا بە لێوت ماچەکانم بچنیتەوە

چیتر وەرزەکانی سەفەرت

ئاوەدانم ناکەنەوە.

دڵم بە توڕەیی و لاساریەکانت دەتەنێ

جارێکی تر .....

باوەشم جێگای تۆی تیا نابێتەوە

ئێستا فرسەتەکان

یادەوەریەکانم لێ ئەڕفێنن

بەختەوەریم لێدەکەن

بە تەرمێکی سارد سارد

وەک هەناسەی منداڵێکی

بێ نەوای سەرشەقام

سارد تر لە هەنسکی ئەو دایکەی

کوڕە تاقانەکەی لە شەڕی براکوژیدا

تائێستاش بێ سەرو شوێنە!

وەک ئەو پیرەمێردەی

لە ناو بازاڕ

بە دیار دووجوت گۆرەویەوە

پەڕاوی سیگار

لەنێو دەستە لەرزۆکەکانیا

بە توتنی ئٔازار ئەپێچێ و ....

گڕ لە حەسرەتەکانی ژیان بەر ئەدا

بە ئازارتر... لە هەناسەی

ژنە دەست قڵیشاوو ماندووەکانی

بەر بەلەدیەکە !!

کەبەدیار سەبەتەیەک پەڵپینە و گەڵا مێوەوە

هەڵکوڕماون!!

تەنها بەسەیر کردنیان

پڕئەبی لە بێدەنگی

ئێستا من پیاسە و گەڕانی هیچ پارکێک و.... هیچ شەقامێک دڵم خۆش ناکەن!

رقم لە هەموو یٔێوارە پر حوزنەکانە

کە ئەمبەنەوە سەر ....

برینە قوڵەکانی دابڕان و..

جودایی !!

کاتێ نەورەسەکانی سەر شەپۆلەکانی دەریا

باڵ لێک ئەدەن و...

سەما بۆ خۆشەویستی ئەکەن!

دڵم.... دائەخورپێ ! لە

گمە گمی کوکوختیەکان

پێشبینی هەواڵی ناخۆش ئەهێنن!!

هێڵنج ئەدەم

لە شەپۆلەکانی دەریا

کاتێ (ئایلان) ئەبینم

بە بلوزی سوورو قۆنەرە شینەکانیەوە

کەس بە هاواری ناگا!!

دڵم پڕە...

پڕتر لە دڵی نیشتمان

کە ئەبینم هەر رۆژەو...

بەدەست باوە پیارەیەکەوە

دەستدرێژی ئەکرێتە سەر

رووت رووتی ئەکەنەوە

هیچ شۆڕشگێڕێک خاوەنداریەتی ناکا

من ئەمەوێت...

لەو خەوە غەفڵەتیە ڕاچڵەکێم و

بەئاگا بێمەوە!!

چیتر نەبم بە بەشێک لەتۆ

چاوەکانم بۆ روانینت نەڕێژم

ئەمەوێت ...

هەر خۆم بم، وەک خۆم

چیتر جێ پەنجەکانم

بەسەر نیگاکانتەوە نەمێنێ !

ئەمەوێت ..

تەنیایی خۆم...

لەسەر لافیتە رەشەکانی پرسە بنووسمەوە!

بە هەموو دیوارو کوچەو کۆڵانەکانی شار هەڵیواسم !

ئەمەوێت....

بە هەموو مرۆڤەکان بڵێم

من ژنێکم لە جنسی پەپوولە

سەمای شنەبا

بانسێکی ئەم ڕۆژگارە ئەبەخشم

بە گوڵە دەم بە خەندەکانی نێرگز!

ئەمەوێت....

وەک خۆم بم!!

نە وەک ئەوکەسانەی،..

کە بەرووتدا پێ ئەکەنن!!

لە پشتا ترش و خوێ ئەکەن

بەسەر برین و ئازارەکانتا

ئەمەوێت ...

لە ژوورەکەمدا بێدەنگ بم

بێدەنگ بێدەنگ ...

دوور لەساتەکانی بێزاریم!!

ئەو بێزاریەی،...

کە بۆتە ڕێچکە ڕێی ژیان و تەمەنم!!

ئیتر تۆش،...

پرسەی کەسێکی نادیاری دووریت ئەبێتە ئەسەف و ...

تەنها دوو دڵۆپە فرمێسکی پەشیمانی!!

ئەوسا منیش....

بەهەناسەو گڕو تینەوە

لەژێر رێژنە بارانی پاییزدا رادەکشێم و...

سەر ئەخەمە سەر تێکستی شیعرەکانم و...

بە ئەسپایی ئٔەچرپێنم بە گوێی وشەکان و پێیان ئەڵێم:

ئەگەر ئٔێوە نەبوونایە،...

باران زاتی ئەوەی نەبوو

رۆحی پەپولەیم بشواتەوە!

ئەگەر ئٔێوە نە بوونایە

رۆحم ئەچوە سەر کۆڵانەکانی جەفا

ئەگەر ئێوە نەبوونایە

شەقام لەسەر پشت هەڵیدەگرتم

تا ئەو پەڕی دنیا!!

یٔەگەر ئێوە نەبوونایە

نە کتێب ئەبوو !!

نەشیعرو

نەفەرهەنگ و

نە قەسیدە.

 

 


ئەم بابەتە 154 جار خوێندراوەتەوە