antolojya.jpg

شیعری ژنان زمانی كوردی و فەڕەنسی ئاوێتەی یەكتر دەكات

یەكێتی نووسەرانی كورد / لقی سلێمانی، بەهاوكاریی دەزگای فەڕەنسی هارماتان/بەشی میللەت و كولتور و ئەدەبیاتی رۆژهەڵات، كۆڕێكی تایبەت بە شیعری ژنانی كوردستان بەفەڕەنسی و كوردیی بەڕێوە دەبات.
بەمەبەستی ناساندنی ئەنتۆلۆژیای شیعری ژنانی كوردستان بەزمانی فەڕەنسی كە لە ساڵی ٢٠٢١ لە لایەن دەزگای چاپ و پەخشی هارماتان / بەشی میللەت و كولتور و ئەدەبیاتی رۆژهەڵات بڵاوبۆتەوە، یەكێتی نووسەرانی كورد لقی سلێمانی بەسەرپەرشتی شاعیر و نووسەر كەژال ئەحمەد و دەزگای هارماتان بەسەرپەرشتی شاعیر و نووسەر د. نەزەند بەگیخانی، كاتژمێر (3)ی پاشنیوەڕۆی رۆژی چوارشەممە (12/1/2022) لەهۆڵی نووسەران، كۆڕێكی شیعری بەهەردوو زمانی كوردی و فەڕەنسی بۆ كۆمەڵێك ژنە شاعیری كوردستان رێكدەخەن.
ئەنتۆلۆژیای شیعری ژنانی كوردستان هەڵبژاردەیەكە لەشیعری ٣٠ ژنە شاعیر لە پارچە جیاوازەكانی كوردستان. شیعرەكان لەلایەن شاعیری كورد د.ئەحمەدی مەلا-وە كۆكراونەتەوە و وەرگێڕدراون ، شاعیری فەڕەنسی نیكۆل باریێر پێشەكی بۆ كتێبەكە نووسیوە و نووسەر ژێرار شالیان هەڵیسەنگاندووە،پڕۆژەكە لەلایەن د. نەزەند بەگیخانی- یەوە سەرپەرشتی كراوە وەك بەڕێوەبەری بەشی ناوبراو لە دەزگای هارماتان لە پاریس.
هارماتان یەكێكە لە دەزگا بەناوبانگەكانی چاپ و پەخش لە فەڕەنسا كە لە ساڵی ١٩٧٥ لە پاریس دامەزراوە.

270364507_965978314344264_7245225938563523905_n


ئەم بابەتە 78 جار خوێندراوەتەوە