255268746_2108145059333405_8892201452378269364_n.jpg

بەلەمەکەی (سامی هادی) پڕە لە شیعری موهاجیر !

جەمال غەمبار

کاکە سامی، 
بە خودای موجامەلەت ناکەم و ڕەنگە چەند ساڵێکی تریش نەتبینمەوە. وەلێ ئەم تێکستەی خوارەوەم بۆ خاوەنی( بەلەمی نادیار ) نووسیوە ..
چونکە تۆ ، نەک بە تەنێ ڕێزی  ئینسان ، بگرە ڕێزی مێروولەکیش دەگریت کە دەنکێ گەنم دەگوێزێتەوە بۆ مێرووستانەکەی ...

لە جەمال غەمبار ەوە

سامی ، فێر نییە بە دەنگی بەرز 
شیعر بنووسێ ! 
ئەو لەگەڵ کۆچەریان
حەزی لێیە شیعر بۆ سروشت بخوێنێتەوە ! 
حەزی بە هۆڵی قەرەباڵغ و 
بە دانیشتنی پڕ دووکەڵ و 
قسەی زۆر نییە !
ئێوارەیەکی زستان 
لە گوندێ ، دانیشتنێکی دۆستانە هەبوو 
رەخنەی لە من گرت 
گوتی ؛ شاعیر نابێ گۆشتی مریشک بخوات 
شاعیر بۆ ئەوەی نەمرێ
دەبێ بە داوای لێبووردنەوە 
روخسەت لە رووەک بخوازێ بۆ خواردن !
ئەو ئێوارەیە هەستم کرد 
سامی لە زۆربەمان ، شاعیرترە .
نەک هەر ئەوە ، 
سامی ، سەدەیەک زیاترە
دەخڵی سیاسەت دەکات 
کەچی قەت رۆژێ 
نەیهێشتووە رۆحی ، شلوێ بێ !
زۆر جاران ، 
ئێرەییت پێ دەبەم 
ئەی هاوڕێیەک 
هەمیشە بە عەینەکی شیعرەوە 
دەردەکەویت ! 
لەو جەنگەڵستانە
چۆن ماویت ! 
چۆن گورگ زەفەری بە رۆحت نەبردووە !
دڵنیام 
تۆ لە هەر بەلەمێکدا 
سەوڵ لێ دەیت 
شەپۆلەکان پڕ دەکەیت لە شیعر و 
لە خۆت!

 

235506486_2715222445444894_7919659888635443696_n


ئەم بابەتە 115 جار خوێندراوەتەوە