viber_image_2021-12-31_02-55-51-592.jpg

کەوتنی ئیمام

شەماڵ بارەوانی

”کەوتنی ئیمام“ شاکارێکیتری کەم وێنەی

خاتو نەوال سەعداوی"ژنە بوێژ و پزیشک و نووسەرو ڕۆمان نوس و ڕەخنەگری کۆچکردووی میسریە.


ئەو ڕۆمانە بۆ یەکەم جار لەساڵی ۱۹٨۷ بەچاپ گەیەندراوبڵاوکرایەوەو تائێستا بۆ زیاتر لە۲۰زمان هاتووەتە وەرگێڕان و دوای ۱۷ساڵ لەدەرچوونی و لەساڵی ۲۰۰٤ ئەزهەر فەتوای بەتابوو کردن و قەدەخەکردن و حەرامکردنی دەرکرد!
خاتوو نەوال لە «کەوتنی ئیمام»دا باس لەنموونەی فەرمانڕەوایەکی ناڕەوای دیکتاتۆری خۆسەپێن و ستەم کاردەکات، دیکتاتۆرێک ئایین وەک ئامرازێک بۆ گەیشتن بە ئامانجەکانی بەکاردێنێت،ئەو دیکتاتۆرێکە وەک بەشێکیتر لەدیکتاتۆرەکان پۆشاکی ئایینی پۆشیوەو بەناوی خوداوەندو ئاسمانەوە بڕیار دەردەکات و قسەدەکات و فەرمان دەدات و ئایین تێکەڵ بە سیاسەت دەکات بۆ مەرامە تایبەتییەکانی خۆی و بەدی هێنانی خەونە دیکتاتۆرییەکانی،
وەک سرووشتی هەمیشەیی و سیفەتی خۆی خاتوو نەوال کە بە ژنێکی جێندەرخوازو یەکسانی خوازو تابووشکێن و یاخی لەو بوارە هاتووەتە ناسین و ئەو تا دوا چرکەکانی ژیانی داکۆکیکارێکی سەرسەختی مافی مرۆڤەیل بەگشتی و ژن بەتایبەتی بوو و شەوڕۆژ کاری دەکرد بۆ هۆشیارکردنەوەی ژن و خەباتی دەکرد لەپێناو مافەکانی ژن ،
نەوالی نەمرو هەمیشە زیندوو لەو شاکارە مەزنەیشیدا مینا هەموو چیرۆک و ڕۆمان و نووسین و بەرهەمە ئەدەبی و فیکری و زانستیەکانی تری فۆکەس دەخاتە سەر کریزی ژن و باس لە مامەڵەکردنی جڤاتی نەریتی و بیری نێرسالاری لەگەڵ ژن و چەوسانەوەو بێ ماف کردن و زەوتکردنی سەربەستی ژن وبێ بەشکردنی لەسەرەتاترین ئازادییەکانی دەکات لەلایان پیاوەوە،
چۆن لەجڤاتە عەرەبی و ئیسلامی و ڕۆژهەڵاتییەکان پیاو بێ هێزی ژن بەهێزی خۆی دەقۆزێتەوەو ژن دەچەوسێنێتەوەو بەکاری دەهێنێت بۆ مەرەم و مەبەستی حەزە نێرسالاریەکانی خۆی ، ئەو بەهێزیەی لەڕێگەیەکی نازانستی و نا لۆژیکی و ناسرووشتییەوە بەخۆی بەخشیەوەو کۆسپ و ڕێگری لەبەردەم هێزی ژن درووست کردووە و ناخوازێت ژن بەهێزبێت و هەستێتەوە سەرپێیەکانی خۆی و سەربەخۆیی خۆی بەدەست بێنێتەوەو ببێت بە خاوەنی هێز و، ئیرادە بنوێنێت و ئازادییە زەوتکراوەکانی و مافە خوراوەکانی خۆی لە دەمی دێوەزمەی ئەقڵیەتی نێرسالاری دەربهینێت،
لەو کۆمەڵە خێڵەکی و نەریتیانەی کە هێشتا زۆریان ماوە ئاشنای بنەماکانی مرۆڤ بوون و یاساکانی جێندەر و پڕەنسیپەکانی فێمەنیزم بوون بن و لەگەوەرەیی و بەهاو پێگەو پیرۆزی ژن تێبگەن و چیتر ژن نەچەوسێننەوەو فێربن ڕێزی ژن بگرن و بە پیرۆزی بزانن و وەک مرۆڤێکی کامڵ و خاوەنی ئیرادەو ئازادی و ماف و کەڕامەت لێی بڕوانن،
لەو کۆمەڵە پیاوسالارییانەی هێشتا لەزۆر شوێندا ڕێگە نادرێت ژن بخوێنێت و ببێت بە خاوەنی خۆی و بازرگانی بکات و ئابوری خۆی هەبێت و لەبواری زانست و پەروەردەو فیکردا پەرە بەتواناکانی خۆی بدات و بەرەو پێشەوە بچێت و بێتە ناو دنیای سیاسەت و ببێت بە سەرکردەو سەرۆکی وڵات و مینا پیاو بەژداری تەواوی سێکتەرەکانی ژیان بکات و ئەو دەرفەتەی بۆ پیاو ڕەخساوە بۆ ئەمیش بڕەخسێت و چیتر لە ژێر هیچ ناوێک و بەهیچ پاساوێک و بەناوی هیچ پیرۆزییەک شیان و تواناو ئازادی و مافەکانی ژن تیرۆر نەکرێن و نەخرێنە ژێر پێ و ،کەسایەتی ژن بە قەفەسی نێرسالاری زیندانی نەکەن و بە کۆمەڵێک بڤەی بێ ماناو هێڵی سووری دەستکرد، پێشێلی ئازادی ژن نەکەن و چوار دەوری هەنگاوەکانی ژن مین ڕێژ نەکەن و خەون و خۆزگەکانی لەبار نەبەن، دەست لەژیان و تایبەت مەندی و ئاواتەکانی وەرنەدەن، هێزو وزەو ورەی ژن نەکوژن و دەست بەسەرکەسایەتیدا دانەگرن،خاتوو نەوال لەکەوتنی ئیمامدا باس لە چەوسانەوەی ژن دەکات لەسایەی هەژموونی بیری نێرسالاریدا، چۆن ئافرەت دەچەوسێندرێتەوە لەلایان دەسەڵاتێکی تاکڕەوی دیکتاتۆر،باوکێکی خۆسەپێن، هاوسەرێکی ستەم کار و خانەوادەیەکی تەقلیدی و کومەڵێکی نەریتگەراو کۆنەخوازی نێرگەرای دابڕاو لە پێوەرەکانی شارستانییەت و نا ئاشنا بە هزرو ئایدیاکانی دنیای مۆدێڕنەت و بەهاکانی مرۆڤ بوون و یاساکانی جێندەر و ڕێساکانی فێمێنیزم،
هەندێک لە ڕەخنەگران بۆچوونیان وایە کە مەبەستی خاتوو نەوال سەعداوی لە ئیمام لەو ڕۆمانەیدا.
سەرۆکی پێشووی میسر(ئەنوەر سادات) و هاوکاران و سەردەمی سیاسەت و فەمان ڕەوای ئەوە،
 

ئەو ساداتەی خۆی وەکو کەسێکی بڕوادار پیشان دەداو ئایینی دەکرد بە دەریجەیەک و پەردەیەک بۆ سەرکوتکردن و چەوسانەوەو بۆ بەرژەوەنی خۆی بەکاری دەهێنا،
خاتوو نەوالیش ئەوەی ڕەتنەکردووەتەوەو لەیەکێک لە لێدوانەکانیدا گوتی چیرۆکی ڕۆمانەکەی باس لە سەرۆکی یەکێک لەوڵاتەکان دەکات کە خۆی لێ بووە بە نوێنەری خواو بەرگی دیکتاتۆرییەتی پۆشیوەو کەسێکی ستەم کارەو بە زەبری ئاگر و ئاسن حوکمی گەل دەکات و لەچرکەساتی ئاهەنگ گێڕان بەبۆنەی جەژنی سەرکەوتن تیرۆرکرا،
هەرچەند ئەو ڕۆمانەی نەوال سەعداویش هاوشێوەی زۆربەی نووسینەکانی تری ڕووبەڕووی شاڵاوی شەپۆڵێک لە تووڕەیی و ڕەخنەو هێرشکردنەسەرو ڕێگری لێ کردن و کاردانەوەی توند بوویەوەو جەدەل و مشتومڕی زوری درووست کرد، لەناوەندە ڕۆشنبیریەکان لە میسر و
لەلایان ئەو شەمشەکوێرانەی ڕقیان لەتیشکی خۆرو ڕوناکیەو حەزیان بە نەزانینەو چێژ لە دواکەوتوویی و جەهل دەبەن و ناخوازن مرۆڤایەتی لەئەشکەوتە تاریکەکەی ئایدیۆلۆژیا نامرۆڤانەکەی ئەواندا بێتە دەرو چاوی ببێتەوەو دنیای فراوان و ژن بوون و مرۆڤ بوون و خۆری ئازادی ببینێت!
ئەو کۆیلانەی لەسەر ژیانی کۆیلایەتی ڕاهاتوون و ڕقیان لە یەکسانی و ئازدیەو ناخوازن ژن هۆشیارببێتەوەو بخوێنێت و تێبگات و بەرەو پێشەوە هەنگاو بنێت، بەڵکوو دەیانەوێت ژن هەر لەژێر هەژموون و دەسەڵاتی خۆیان دا بمێنێتەوەو ژن پاشکۆ و کۆیلەو سێبەری خۆیان بێت و هەر خۆیان بڕیار لەسەر ژیانی ژن بدەن و پێی بڵێن چی بکات و چی نەکات و چۆن بخەوێ و چ شێوازێک بخوات و چۆن بچێتە بازاڕو چۆن و کەی و بەکێ شوبکات!


ئەو کۆنە خوازانەی هێشتا لەدەرەوەی مێژوودان و لەسەر عن عەنەو قیلەو قال و گۆتی و گۆتیاندا درێژە بە ژیان دەدەن و لەشوێنی خۆیان دا چەقیان بەستووەو چونەتە حاڵەتی بەبەستەڵەکبوونی ئەقڵ و بەدۆگمایی بوونی فیکرو ئامادەنین یەک هەنگاو بۆ پێشەوە بڕۆن و بڕواو خەیاڵیان وایە پێشینان و ئەوانەی زیاترلە هەزار ساڵ بەر لەئێمە هیچیان بۆ ئێمە نەهێشتووەتەوەو ئەوەی گرنگ و پێویستە ئەوان هەموویان گوتووە، تەواو ئیتر ئێمە هیچمان بۆ نەماوەتەوە!
ئەو بیرداخراو ڕوانین تەسک و مێشک قفڵدراوانەی
دژی هەموو داهێنانێک و نوێنەبوونەوەیەکن و هەر بیرۆکەو شتێکی نوێ و تازە بە هەرتەقەییبوون و گومڕایی و سەر لێ شێواوی و لادان لە نەریتەکۆن و مەزهەبە داخراوەکەی خۆیان دادەنێن و دژی کۆنسێپتەکانی نوێگەرایی و مۆدێڕنێتەو ئەقڵانییەت و سیکۆلاریزمن و چێژ لە تاریکی ئەشکەوتوو جەهلی موڕەکەبی خۆیان دەبەن و وادەزانن جیهانی فراوان هەمووی ئەو ئەشکەوتە تاریکە فیکریەی ئەوانەو هیچیتر! دەڵێن جارێک فیلێک لەبیابانێکی دابڕاو وشک و دوورە دەست، دەسوڕایەوە، لەنکاوڕا گوێی لەدەنگێک بوو لەناو چاڵێکی نزیکیەوە!
کاتێک سەیریکرد. بینی ئەوە مشێکێکە لەناو چاڵەکە،گوتی هاوڕێ مشکێ گیان ئەوە چیدەکەیت لەو چاڵە تەسک و تاریک و داخراوە؟
مشکەکە گوتی:خەریکم لەو دنیایە فراوانە دەسوڕێمەوە،فیل خەندەیەک نیشتە سەر ڕووی و کلکی خۆی شۆڕکردەوە ناو بیرەکەو گوتی سەرکەوە قوربان با لەو قۆرتە تەنگ و تاریک و بچوکە ڕزگارت کەم و جیهانی فراوانت پیشان دەم!
ئەوانە مشک ئاسا له چاڵی تاریک و داخراو و تەسکی ئایدۆلوجیادا دەژین و مێشکی خۆیان وێران کردووەو بیرو هۆشیان بەبەرد بووە و چرای ئاوەزیان خامۆشکردووە بە هۆی کۆمەلەک نامیلکۆکەی خەلیجی و پەرتوکی عەرەبی و خوێندنەوەی هەندێک بابەتی ئێکسپایەربوو و دەقی سنوردار! ئیتر دەرەوەی ئەو جوگرافیا داخراوو دیاریکراوەی ئەوان تێیدا کەسایەتی و مینتەڵێنت و ئەقڵی خۆیان لەناویدا زیندانی کردووە، هەمووی بۆمبای مەترسیناکی فەلسەفەو مینی گومان و چەکی گومڕایی ئەقڵانیەت و پانتای سەرلێ شێواوی و بڤەو کفر و بەڕەڵایی و هێڵی سورو ماڵوێرانیە،
ئەوانەی ناتوانن چێژ لە داهێنان ببەن لە و گەورەیی هونەر تێبگەن و هەمو ئبیداعێک بە زیادو بێ ماناو بیدعە دەزانن،
ئەوانەی تووشی نەخۆشی بەستەڵەکی ئەقڵی و داخرانی کەلتوری بوون، ئەو بەستەزمانانەی واحاڵی کراون هەرچی عیلم و عەقیدەو سنعات و تانک و تۆپ و تەیارەو دنیاو ئاخیرەتە، هەمووی لەناو نامیلکۆکەو کتێبەکانی ئەوان دەیان خوێننەوە هەن،ئیدی بۆیێ پێویستیان بەچیتر نەماوە تا بیان خوێننەوە! مرۆڤی ڕۆشنبیرو هۆشیارو ژیر دەبێ بابەتی هەمە جۆرو کتێب و بۆچوونی جوایەزو پێچەوانەو دژ بەو ببرو باوەڕو بۆچونە دۆگماییەی پێی تەلقین دراوەو توتی ئاسا لەسەری گۆشکراوە بخوێنێتەوەو سەیری دنیای تری دەرەوەی ئەو چاڵە داخرانەی فیکرو مەودا تەسکە تێگەیشتنە بچوکەی خۆی بکات، بۆوەی چاوی مێشکی بکرێتەوەو ئاشنای جیهانی فراوان ببێت و ئەزموون و ڕۆشنبیری و ماریفەو فەلسەفەو کەلتورو تێڕوانین و عالەمی تر ببینێت و ،
قفڵی دڵ و هۆشی ببێتەوەو ئاسۆی هزر و سنگی فراوان بێتن و دەرگای دیدی واڵابێت و لەو کوێرەوەرییە ئایدۆلۆژیایەی تێی کەوتووە قورتاری بێت، چیتر فێربێت نووسین و ڕەخنەو دیدی تر، دوور لە هەڵچون و ڕق و توڕەیی و دەمارگیری و ڕەفزو خۆبەزلزانی و جوێن، بە ئاسایی وەربگرێت و جیاوازیەکان قبوڵکات و بۆی ئاشکرابێت کە حەقیقەت تەنها لای ئەو نییەو مەولانا وتەنی:حەقیقەت(گەرنەڵێین درۆیەک بوو!) جامێک بوو شکاو هەر کەسەو هەندێکی بەرکەوت"
ئەفسووس ئەو بیرتاریکانە باوەڕیان بە کلتوری سوتان و هێزی چەوسانەوەو بیری نێرگەرێتی و توندوتیژی هەیەو دیاڵۆک و زمانی گفتوگۆ ڕەتدەکەنەوەو بێ تواناو بێ هێزن لە خۆسەلماندن لەڕێگەی زمانەوەو نکارن بەنووسین بەرپەرچی نووسین و بە فیکر وڵامی فیکر بدەنەوەو بە ڕۆمان ڕوو بەڕووی ڕۆمان ببنەوەو بە گفتو گۆ گفتوگۆ بدوێنن.،جگە لە زمانی سانسۆر و بەتابووکردن و بەهەرتەقەکردن و بەئەهریمەنکردنی بەرامبەرو هێزی شەڕانگێزی و قەدەخەکردن و دەست بەسەرداگرتن و ڕێ لێگرتن و دەستوەردان نەبێت، هیچیتر نازانن و باوەڕیان بە هیچیتر نییەو بەناوی نەریتە کۆنینەکان و پارێزگاری کردن لە ڕێساکانی خێڵ و بەرگری کردن لە بیری نامرۆڤانەی نێرگەرێتی خوازی خۆیان و بەناوی پیرۆزی مەزهەبگەرایی، داهێنان و هێزی ژن وەک مرۆڤێک دەکوژن و ڕێگری لە بڵاوکردنەوەی هۆشیاری
 
فێمنێستی دەکەن و کۆسپ و تەگەرە دەخەنە بەردەم پرۆسەی نووسین و هۆشیاری و مرۆڤ بوون!
ئەوانەی زۆریان ماوە لەبنەمای ئازادی ڕادەربڕین و گرنگی داهێنان و زمانی نووسین تێبگەن و بزانن کە کتێب گفتوگۆی دەکرێت نەک قەدەخەبکرێت و ڕێگری لە بڵاو بوونەوەی بکرێت و دەستی بەسەردابگیرێت!
زۆر عەیبەو خەجاڵەتیە لەکاتێکدا بانگەشەی حەقیقەت بکەیت و لەگومان بترسێیت و ڕێگری لە ڕەخنەبکەیت و پرسیارت لا بڤەبێت و نەتوانی دیالۆک بکەیت و باوەڕت بە یەقینەکەی خۆت نەبیت و لەخۆت دڵنیانەبیت،
بەو چەشنە "کەوتنی ئیمام" لەسودان و سەردەمی عومەربەشیرو ئیسلامی سیاسی توند ئاژو لەخەرتۆم دەستی بەسەرداگیراو قەدەخەکرا بە پاساوی دژایەتی کردنی مەزهەب و بنەماجێگیرەکانی ئایین!.
هەروەک ئەنجومەنی لێکوڵینەوەی زانستی ئەزهەر" دوای ۱۷ساڵ لەدەرچوونی ڕۆمانەکە داوای قەدەخەکردنی کرد،
چۆن لەلایان "مجمع البحوث الإسلامية"ی سەربە ئەزهەر پێشنیاز کرا ڕێگری بکرێت لە بڵاو بوونەوەی "کەوتنی ئیمام"لەو وڵاتەداو ئەزهەر قەدەخەی کردوو وەک تابوویەک ناوی ئەو ڕۆمانەی بە هەمان نەریت و ئەقڵیەت و دەسەڵاتی کلێساکانی سەدەکانی ناوەڕاست خستە ناو لیستی کتێبە قەدەخەکراوەکان، بەپاساو بیانووی ئەوەی ڕۆمانەکە لە گەڵ بنەماجێگیرەکانی ئایین یەکتری ناگرێتەوە،
لەکاتێکدا وانییە ئەوە چەواشەکارییەو خاتوو نەوال ئەو تۆمەتانە ڕەتدەکاتەوەو پێمان دەڵێت من باس لە ئزدیواجییەت و دەبڵ مۆڕاڵی ئەخلاقی دەکەم لەکۆمەڵە ڕۆژهەڵاتییەکان و تەنانەت هەموو جیهان و، من لە دژی ستەم و چەوسانەوەی سیاسی دەدوێم، ئەو ستەم و سەرکوتکارییەسیاسەی هەمووان دەچەوسێنێتەوەو مرۆڤەکان دەکات بە قوربانی لەپێناو بەرژەوەندی و مەرامی کۆمەڵێکی کەم لە دەسەڵاتدارو دەست و پێوەندو کاسەلێسەکانی دەروبەری خۆی و سەربەخۆی،
بەو چەشنە لە وڵاتی فیرعەونەکان و فینیقی و قیپتیەکان،وڵاتی نەفرتیتی کورد و مێژوو و سینەماو هوونەر و شارستانیەت، وڵاتی نیل و ئەهراماکان.
ئەو وڵاتەی ئێستای سەردەمی سادات ئیمامێک(سادات) بەڕێوەی دەبات و دەرگەی بۆ ئیسلامی سیاسی واڵاکردووەو هەرچی توندڕۆو توند ئاژۆی سەردەمی جەمال عەبدولناسر بە تاوان و تۆمەتی تیرۆر و توندو تیژی و کاری تێکدەرانە خرابوونە گرتوخانەوە، ئازادکردوو دەرفەتی دا بە ئیسلامی سیاسی ڕادیکاڵ بە دڵی خۆیان گەشەو نەش و نما بکەن و چاڵاکی بنوێنن و میسر بگەیەنن بەو ڕۆژە ڕەشەی ئێستا بەدەستیەوە دەناڵێنێت و باجەکەی ئەو هەڵە گەورەیەی سادات بەقورسی دەدات و کۆمەڵ تووشی داخرانی کۆمەڵایەتی و پەتای بیری توندڕۆی و ئیسلامی فێندەمێنتالیزم و ڕادیکاڵ و سەلەفیگەرایی بووەتەوەو دەیان و سەتان ساڵ گەڕاوەتەوە بۆ دواوە، بەهۆی هەڵەو ڕووپامایی وموجامەلە و پشتگیری حکومەتەکەی سادات لە ئیسلامی سیاسی و هاوکاریکردنیان، وەک خاتوو نەواڵ دەڵێت"حکومەت بانگەشەی چاکسازی دەکات و جێ بەجێشی ناکات، مادام دووڕوویی بۆ ئیسلامی سیاسی دەکات، و هەوڵدەدات بیانخزێنێتە ناو دەزگافەرمییەکان و لەنێویشیاندا ئەزهەر، ئەوە ڕاوەدوونانی داهێنەران بەردەوامی دەبێ".
خاتوو نەوال مەبەستی لەو ڕۆمانە تەنها سادات بەتەنێ نییە، بەڵکوو هەموو ئەو سیاسی و سەرکردەو تەیارو هێزانەی لەسەر سونەت و ڕێڕەوی سادات دەڕۆن،
سادات ئەو ئیمامە سیاسیەی ئایین لە گەڵ سیاسەتە داپلۆسێنەرەکەی خۆی موتوربە دەکات و بەفەتوای پیاوانی ئایینی درێژەو ڕەوایەتی بەدەسەڵاتی خۆی دەدات و ئایین بەو شێوەیە تەوزیف دەکات و بەکاری دێنێت کە خزمەتی مەرام و بەرژەوەندییەکانی خۆی دەکات و لەگەڵ سیاسەتەکەی خۆی دێتەوە، نەوال بۆ دوڕوویی و دەبڵ موڕاڵی سیاسی و سەرکردە عەرەبەکان،
باس لەو چرکە ساتە دەکات کاتێک دوای لادانی نەمێری سەردانی سودان دەکات و دەچێتە کۆشکەکەی و ژوورێک دەبینێت پێی دەڵێن ئەوە ژووری نمێژکردنە، هەمان ئەو ژوورەی دەرگەیەکی نهێنی تێدایە بەرەو ژووری مەیی نووشین دەڕوات!. ئەو نەمیریەی جاڕی جێ بەجێکردنی شەریعەو قەدەخەکردنی مەی دا! دیاردەی ئەو ئایین بەکارهێنانە وەنەبێ تەنها لە کۆمەڵە ڕۆژەهەڵاتییەکان هەبێت و ئایین لەناو عەرەب بەکاربێت و تێکەڵ بە بەرژەوەندی و سیاسەت بکرێت، بەڵکو خاتوو نەوال بۆچونی وایه تەنانەت لە ئەمریکاو ئەوروپاو ئیسرائیلیش بەکاردێ، بۆش پشتی بە هێزیکی بناژۆخوازی مەسیحی دەبەست و شارۆن لەناو جووە ڕاستڕەوەکان هێزی وەردەگرت و لەئۆروپا کلێسا ڕۆڵێکی ترسناکی هەیە لەو یارییە ترسناکەدا! خاتوو نەوال لەو ڕۆمانەدا باس لەو سیاسەتە چەوسێنەرەی فەرمانڕەوایێکی ستەم کاردەکات بەهاوکاری کۆمەڵێک کەسی کاسە لێس و دوو ڕووی دەبڵ مۆڕاڵ لەدەورو بەری، لەنێوانیشاندا کەسایەتی ئایینی و پیاوانی ئایینی هەن، کەهاوکارو بەژدارن لەو سیاسەتە سەرکوتکاریەی ئیمام"سەرۆک"ی فاشیل و ستەمکارو تۆتالیتار وفەتوای بۆ دادەڕێژن و پشتەڤانی سیاسەتە داپلۆسێنەرەکەی دەکەن و دەست خۆشی لە بڕیارە نێرسالارییانەکەی دەکەن و شەرعیەت و ڕەوایەتی بە دەسەڵاتە دیکتاتۆرە مرۆڤ کوژ و ژن کوژەکەی دەدەن،
ماوەتە بڵێیم نەوال سەعداوی ژنەفێمێنست و بوێرو یاخییەکە، کەبە تابووشکێنەری سیاسی و کۆمەڵایەتی ناسراوبوو، ئەو تا لەژیاندابوو لەسەر دیدو هەڵوێست و نووسینەکانی ڕووبەڕووی ئاستەنگی زۆر و گەڵێ نەهامەتی بووەوە لەلایان ئەوانەی دژی ماف ژن و ئازادی و کەرامەتی ژنن، ئەوانەی کاتێک گوێ بیستی چەمکی یەکسانی جێندەری دەبن، سەرو دڵیان دەگیرێت و دەماری نێرسالاریان ڕەق دەبێت، ئەوانەی دەیانەوێ ژن هەر کۆیلەو ژێر دەستە بمێنێتەوەو نێری پاتریارک و پیاوی نێرسالارگەرا بە کاهی دڵی خۆی هەڵی بسوڕێنێت و گەمە بە کەسایەتی و چارەنووس و ژیانییەوە بکات،
 

خاتوو نەوال لەسەر داکۆکیکردن و هەڵوێست و نووسین و لێدوانەکانی لەبارەی مافی ژن و ئازادییەکانی چەندین تاڵی و دەیان موعاناتی چەشت، زیندانی کرا، هەڕەشەی کوشتن و تیرۆر کردنی لێ کرا،داواکرا لە هاوسەرەکەی جیابکرێتەوەو مۆرکی هەرتەقەیی و بێ باوەڕی لەتەوێڵی درا،کتێبەکانی قەدەخەکران و دەستیان بەسەرداگیرا، تۆمەتگەڵێکی زۆری بۆ هەڵبەستراو وەک تاوان بارێک پێناسەکرا!تەنانەت کارگەیشتە ئەوەی ماوەیەک پاسەوان و پارێزوان بۆ ئاسایشی ژیانی دابندرێت لەترسی تیرۆرکردن،
نەوال جەنجگاوەری ڕێگای ڕووناکییەو شۆڕشێکی زانستی و مەعریفی و ئەقڵانی لەدژی بیری کۆنەخوازی و نێرسالاری و نیشتەنیانی ئەشکەوتی تاریکی جاڕدا،
ئەو جەنگەی نەوال پێنووسەکەی وەک چەکێک بۆ دەستدایە و شانی بۆ هەڵماڵی،
جەنگی نێوان دوو وڵات و دوو سەرکردەنییە، لەپێناو داگیرکردنی خاک و جوگرافیاو ئاو نەوت و سنوری یەکتری بێت،جەنگێک نییە لەنێوان دوو هێز بۆپلەو پایەی و کورسی و سامان و پول و بەرژەوەندی بێت،
جەنگێک نییە لەنێوان دوو ئایین و ئایین زابێ، لەپێناو ئایین توندو تیژی تێدا بەرپابێت و خوێنی دەیان و سەتان هەزار مرۆڤی بۆ بێتە ڕشتن و مێژوو سوور کەن بەخوێنی مرۆڤەکان و ناوی جەنگەکەش بنێن جەنگی پیرۆز!
جەنگەکەی خاتوو نەوال سەعداوی جەنگێک نەبوو ماڵی خەڵکی تێدا بکرێت بە غەنیمەو دەستکەوت و هەزاران پیاوی تێدا بکوژرێت و دنیایەک ژن و کچ و خوشک و دایکی خەڵک بکرێت بە کەنێزەی جنسی، جەنگێک ملیۆنان مرۆڤ بکات بە سوتماک و کۆیلە،
جەنگی خاتو نەوال سەعداوی جەنگی نێوان بڵۆک و ئایدیۆلۆجیاکان نەبوو، مرۆڤ تێیدا لەقاڵب بدرێت و چاوی هزری کوێر بکرێت و بکرێت بە ڕۆبۆتێکی بێ هەست و لەپێناو ڕاست یاخود چەپ،
ئەم مەزهەبی فلان ،یان ئەو مەزهەبی عەلان بکوژێت، بسوتێنێت، ببڕێت،وێران بکات،جەنگەکەی خاتوو نەوال جەنگێک بوو لەپێناو مرۆڤ و ئازادییەکانی،
لە پێناو ژن و مافەکانی،
جەنگی یەکسانی و کەرامەت بوو، جەنگی بەهاو مۆڕاڵ و ئینسانییەت بوو،جەنگی زانست و ڕۆشنبیری و ئەقڵانییەت بوو
..
شەماڵ بارەوانی
 
 
 
 


ئەم بابەتە 93 جار خوێندراوەتەوە